PREZIDENTE KI HUSU RAKOM IHA TL, PROMOVE PRODUTU LOKAL KOMUNIDADE NIAN

Bobonaro-20/10/2025-Média Defisensia, Prezidente Konsellu Imprensa Timor-Leste abertura interkambiu utilizasaun Website no Radiu Streaming iha ambitu komemora trajedia Balibo 5 no selebra loron nasional Liberdade Imprensa ba dala 3 iha Timor-Leste.

Prezidente KITL, Antonio M. D. C. Moniz Mali hateten, Radiu Komunidade nia knaar importante tebes, hodi fó sai atividade komunidade nian iha baze liuliu munisipiu ida-idak relasiona ho promove produtu lokal no kultura timor nia ba mundu liuhusi Radiu Streaming.

“Imi Radiu Komunidade sira mak lori timor ba mundu liuhusi área rural sira hanesan promove produtu lokal timor nian liuhusi radiu. Radiu Streaming ida-ne’e la’os para iha ne’e de’it, maibé koalia kona-ba plataforma dijital ne’e boot tebes, liuhusi Radiu Streming ema iha mundu tomak bele asesu. Ita boot sira nia knaar atu promove ita nia kultura, ai-han lokal no ema ba mundu, nune’e ema estranjeiru sira mós bele mai hola parte iha investimentu ida”, Dehan Prezidente KI iha Salaun Balibo Five,14/10.

Prezidente KI enkoraja, programa interkambiu ne’e importante tebes tenke badinas, hato’o ideia ba malu, hodi  hala’o servisu hanesan ema jornalista hato’o informasaun ba komunidade iha munisipiu sira.

“Programa ohin  interkambiu importante tebes tanba formasaun ne’e la’os de’it hasai ita boot sira nia skil no objetivu ne’e laos atu sai matenek de’it. Maibé atu hametin liutan ita boot sira nia knar, tanba jornalista RAKOM sai hanesan edukadór, ajente transformadór ba mudansa. Hau fiar RAKOM bele muda komunidade nia moris  ba oin la’os ema seluk”, Salienta Prezidente KI.

Entretantu, Prezidente KI dezeiju ba formadór no koordenadór sira favor dedika imi nia aan tomak ba ita nia alin sira, fó materia ne’ebé sira presiza tanba sira reprezenta komunidade iha área rural. KI fiar RAKOM sira nia susesu tomak ba sira ne’ebé konsege hola parte iha interkambiu ne’e, hodi fahe imi nia matenek ba malu, tulun malu no reforsa unidade hodi lori nasaun ne’e ba oin.

Iha fatin hanesan Administradór Postu Administrativu (APA) Balibo, Casimero dos Santos, agradese ba prejensa husi representante SEKOMS, Prezidente KI no Radiu Komunidade iha Timor-Leste, Radiu Akademika UNTL no UNITAL nia prezensa iha Postu Balibo, hodi realiza interkambiu no selebra trajedia Balibo Five ba dala 50.

“Hau sente orgullu tebes tanba ohin loron ita hasoru malu iha  fatin ne’e, hodi halo atividade interkambiu ne’ebé organiza husi SECOMS no ARKTL.  Atividade ne’e hodi komemora loron trajedia jornalista na’in lima nian ba dala 50 no loron Liberdade Imprensa ba dala 3 ita selebra hamutuk iha Postu Balibo. Hau agradese ba exselensia sira nia partisipasaun no kolaborasaun hodi servisu hamutuk. Agradese ba SECOMS, Konsellu Impresa no Radiu Komunidade sira hotu bele mai hamutuk hodi selebra loron jornalista nian iha Postu ne’e”, Apresia APA Balibo.

Tuir partisipante,  Geraldino Pereira Magno, husi Radiu Komunidade Defisensia, sente kontete bele partisipa iha atividade interkambiu ne’e. Atu bele aumeta koñesimentu kona-ba oinsa fahe informasaun liuhusi Website no Radiu Streaming, nune’e bele fila ba implementa iha estasaun radiu ne’ebé hola parte ba.

“Hau sente kontete tebes bele hola parte iha atividade interkambiu ne’e, hodi bele rona ideia foun sira no aprende buat foun sira husi ita nia fasilitadór kona-ba prosesu fahe informasaun liuhusi website no aprende kona-ba Radiu Streaming oinsa atu bele uza aplikasaun sira hanesan mix, icecast hodi fahe informasaun sira direta no indireta liuhusi frekuensia radiu maibé ho modelu online. Hau apresia tenbes ba ARKTL bele konvida ona ami radiu komunidade sira hodi partisipa iha interkambiu no fahe ideia ba malu oinsa atu dezenvolve radiu sai online”, Tenik Partisipante.

Entretantu, atividade Interkambiu ne’e hetan apoiu husi SEKOMS servisu hamutuk ho ARKTL, no abertura husi Prezidente KI, partisipante sira husi radiu komunidade 21 inklui Radiu Akademika UNTL no UNITAL.

Jornalista : Geraldino no Eufrozina

Editor  :  Média RKDTL

 

Post a Comment

0 Comments