PROFESSOR KONTRATADU HUSU ME ATU TAMA INGRESSU ESPESIAL TUIR LEI NE’EBÉ IHA

 

Dili-15/01/2024- Media Defisiensia, reprezentante professor kontratadu hala’o pres-konferense hodi husu Ministeriu Edukasaun atu la bele hapara sira nia kontratu.

Tuir portavoz Elizario Soares Barreto hatete, hakarak husu ME atu sira bele tama iha ingressu espesial tuir dekretu lei numeru 31/2023, 31 de Maiu 2023 ne’ebé fó dalan atu tama ingressu espesial, maibé assessor legal sira la fó dalan.

“Ohin ami mai husu legalidade tuir dekretu lei numeru 31/2023, 31 de Maiu ne’ebé fó dalan mai ami atu tama ingressu espesial maibé assessor sira dehan ami la iha direitu tama ingressu espesial tanba seidauk iha avaliasaun dezempeñu mais tuir lei funsaun publiku hatete ona periodu avaliasaun desempeñu ba funsionariu publiku no ajente administrasaun publika hahú iha Janeiru to’o Março, maibé nafatin sira dehan labele fó prioridade liu ba malae sira ne’ebé mak servisu iha ne’e mak iha direitu liu,” dehan portavoz ne’e iha ME Vila Verde.

Nia hatutan, sira sei nafatin hein hela karta notifikasaun ida ba sira atu bele hala’o prosesu tuir mai, kuandu laiha rezultadu maka sira sei nafatin hein to’o hetan nia solusaun.

“Ita sei mantein nafatin to’o fulan tolu ne’e husu para sei hasai notifikasaun ida ba ita par ita hodi reklama ba iha prosesu tuir mai, bainhira kuandu karta notifikasaun la iha ita sei mantein nafatin ita nia pozisaun iha eskola no iha ministeriu ida ne’e to’o hetan solusaun,” hatutan nia.

Nune’e sira kestiona mós kona-ba bolsa kandidatu ne’ebé loke, sira sei la konkore iha vaga refere.

“Liafuan bolsa de kandidatu ne’e ba mea sira ne’ebé seidauk sai professor da liña, seidauk hanorin estudante iha sala laran ne’e mak dehan bolsa kandidatu, tanba ne’e ba ami sira ne’ebé hanorin ona durante tinan 10 ba letan no hetan ona rekoñesimentu husi ita nia estadu liu husi governu anterior ninian ami la iha tan atu ba partisipa iha teste bolsa de kandidatu,” hakotu nia.

Entretantu professor kontratadu hirak ne’e balun husi munisipiu no barak husi Dili.

Jornalista                   : Pascoal Nascimento de Jesus

Editor                         : Media RKDTL