FOKUPERS NO RFTL KONDENA HAHALOK ASÉDIU SEKSUÁL IHA INSTITUISAUN EDUKATIVU

Dili-09/10/2025-Média Defisensia, Fokupers Timor-Leste hamutuk ho  Judicial System Monitorig Program  (JSMP)  no Rede Feto Tmor-Leste (RFTL), kondena hahalok asédiu seksuál neʼebé akonteese iha instituisaun edukativu sira, tanba fatin ba prosesu apredizajen la’os seksu.

Tuir Porta Voz, Silveiro da Silva de Araújo hatete, iha konferensia imprensa FOKUPERS, JSMP no Rede Feto-TL bazeia ba vídeo ne'ebé dadauk ne'e viral no akontesimentu sira seluk sai ona konsumatoriu públiku, husu Universidade Nasional Timor-Lorosa'e liuhosi Magnifiku Reitor no unidade pro-reitoria atu emidiatamente foti asaun urjente hodi suspende suspeitu hosi kna'ar nu'udar Manorin.

“Ami Husu ba Universidade Nasional Timor-Lorosa'e (UNTL) liuhosi Magnifiku Reitor no unidade pro-reitoria atu emidiatamente foti asaun urjente hodi suspende suspeitu hosi kna'ar nu'udar Manorin na'in iha UNTL hodi hein prosesu tuir mai. Husu liuhusi konsellu disiplinar atu loke prosesu investigasaun ba suspeitu sira ne'ebé prátika aktu violénsia asédiu seksual iha kampus ho Rigoroso, imparsial no transparensia. Universidade Nasional Timor-Lorosa'e (UNTL) tenke aplika sansaun disiplinar ba Autór ne'ebé kulpadu bazeia ba gravidade kazu no labele admite ema ne'ebé hanesan predator seksuál atu kontinua kna'ar hanesan manorin nain”, Dehan  Porta Voz iha Salaun  FOKUPERS Farol, Dili, 08/10.

Porta Voz mós salient tan, ezije ba Ministeriu Edukasaun atu haree eskola sira hotu  atu estabelese mekanizmu simu keixa ka denunsia ho konfidensialidade, seguru no sentradu ba vítima iha eskola sira, hodi  asegura ambiente edukasaun ne'ebé seguru.

“Husu ba Ministériu Edukasaun ho seriedade atu obriga eskola sira hotu hosi nivel primaria to'o ensinu superior atu estabelese mekanizmu simu keixa ka denunsia ho konfidensialidade, seguru no sentradu ba vítima iha eskola sira, no mós husu ba ministériu edukasaun foti responsabilidade nu'udar estadu atu implementa Rekomendasaun CEDAW Komite ba Estadu Timor-Leste iha Maio 2023 kona-ba asegura ambiente edukasaun ne'ebé seguru no iha fasilidade ijiene no labarik-feto sira, inklui transporte seguru no fó kastigu adekuadu ba kazu asédiu no violénsia bazeia ba jéneru, hasoru labarik-feto no feto sira iha instituisaun edukasaun. Husu ba dosente sira atu labele uja ita-bo'ot sira nia influensia no superioridade no vulnerabilidade estudante sira nian hodi atinje ita-bo’ot sira nia nesesidade no dezeju seksuál. Hatu’ur ita bo'ot sira nia maturidade hanesan edukadór, no mós kaer metin ba orientasaun Nu.12/2017, 9 de Agosto husi Komisaun Funsaun Públika kona-ba prevensaun no kombate asédiu seksuál iha funsaun públika. Ba Ministériu atu kria sistema avaliasaun ida neʼebé mak transparente no bandu atividade eskola nian hotu tenke halo iha resintu eskola nian, labele fora hosi resintu eskola nian. Ami husu ba PDHJ, atu asegura implementasaun Lei liuhosi monitorizasaun ba lei sira Manuais, Regularmente iha implementasaun sira ho efikas tuir prinsípiu Boa Governasaun”, Tenik Porta Voz Silveiro.

Entretantu iha konferensia ne'e, manifesta preokupasaun sériu relasiona ho keixa ka denúnsia ba kazu asédiu seksuál no abuzu seksuál neʼebé akontese iha instituisaun edukativa sira. Akontesimentu sira-ne'e hatudu katak Estadu Timor-Leste falla tebes iha nia mekanizmu prevensaun, protesaun no denúnsia neʼebé eziste iha sistema edukativu. Ba públiku nia koñesimentu, Asédiu seksuál mak komportamentu la ho hakarak ho natureza seksuál neʼebé afeta dignidade feto no mane ka konsidera ofensivu ho liafuan (verbal), la ho liafuan (non-verbal) ka fizikamente, hanesan tau liman, halo koméntariu ho natureza seksuál, hatudu pornografia, husu favor seksuál, ka kria ambiente serbisu ne'ebé intimidadu, hostil, humilhante no halo vítima sente inseguru iha fatin públiku sira.

Jornalista  :  Geraldino Magno

Editor        : Média  RKDTL