PR FÓ BENVINDU BA PM MALÁZIA NIA VIZITA OFISIÁL MAI TIMOT-LESTE

Dili-24/09/2025-Média Defisensia, Prezidente Repúblika Demokrátika Timor-Leste, hoksolok boot fó benvindu ba belun di’ak, Primeiru-Ministru Malázia Onoravel Dato’Seri Anwar Ibrahim nia vizita ofisiál mai Timor-Leste.

Prezidente Repúblika, José Ramos-Horta hatete, Primeiru-Ministru Malázia nia vizita ne’e hanesan prova ida ba amizade ne’ebé kle’an, entre ita-nia nasaun rua hodi  hametin liuhusi kompromisu komún ba demokrasia no pás. Timor-Leste komprometidu atu servisu besik liután ho Malázia no membru ASEAN hotu iha futuru.

“Vizita ne’e nu’udar prova ida ba amizade ne’ebé kle’an no metin entre ita-nia nasaun rua-amizade ida ne’ebé harii iha solidaridade no hametin liuhusi ita-nia kompromisu komún ba demokrasia, justisa, no pás. Malázia hamutuk ho ami durante momentu krítiku sira iha ami-nia istória, no apoiu metin povu Timor-Leste, nunka atu haluha. Diskusaun la’o ho di’ak, konstrutivu, no foka ba futuru. Ami komprometidu atu serbisu besik liután ho Malázia no membru ASEAN sira hotu atu kumpri kritériu sira ne’ebé sei falta iha ami-nia dalan atu sai membru plenu”, Dehan PR iha Palasiu Prezidente, Dili, 23/09.

Hatutan Prezidente Republika, Governu Timor-Leste sei rona Primeiru-Ministru nia hanoin matenek, bainhira hato’o ninia palestra ba ita-nia nasaun iha Séri Palestra Prezidensiál 2025 ba dala-IV ho tema “ASEAN no Papel Timor-Leste nian.”

“Ami mós konkorda atu hametin liután ita-nia kooperasaun bilaterál ba ita-nia povu rua nia benefísiu. Ami sei enkoraja investimentu boot liután husi Malázia iha ami-nia setór xave sira hanesan agronegósiu, turizmu, no enerjia renovável. Ami sei habarak liután oportunidade ba ami-nia foin-sa’e sira liuhusi edukasaun no formasaun vokasionál iha Malázia. No ami sei serbisu hodi fasilita viajen no komérsiu. Timor-Leste no Malázia la’ós de’it nasaun viziñu ita mak parseiru iha konstrusaun Sudeste Aziátiku ne’ebé dame, prósperu no integradu. Ha’u fiar vizita ne’e sei loke kapítulu foun ida ne’ebé importante tebes iha ita-nia relasaun”, Tenik PR.

Entretantu, iha vizita Primeiru-Ministru Malázia nian sai onra boot ba nasaun Timor-Leste, atu kondekora Primeiru-Ministru Dato’ Seri Anwar Ibrahim ho Grande Kolar OrdemTimor-Leste. Kondekorasaun ida-ne’e nu’udar rekoñesimentu ba ninia advokasia pesoál no kleur ona Malázia nia papél xave, iha ninia lideransa nia okos, hodi apoiu TL nia dezenvolvimentu nasionál no jornada atu sai membru ASEAN ba dala-11.

Jornalista   :  RKDTL Asesu liuhusi Komunikadu iha Pajina PP

Editor        :  Média RKDTL