OFISIALMENTE PR SIMU KARTA KREDENSIAL HUSI EMBAIXADÓR FOUN UNIAUN EUROPEIA IHA TL

Dili-18/09/2025-Média Defisensia, Prezidente Republika Demokratika Timor-Leste, ofisialmente simu karta kredensial husi Embaixador Foun Uniaun Europeia nian mai Repúblika Demokrátika Timor-Leste Exelensia Thorsten Bargfrede.

Tuir Prezidente no Laureadu Nobel ba Pás, José Ramos-Horta, hatete relasaun diplomátika entre Timor-Leste no Uniaun Europeia, ne’ebé harii iha loron 20 fulan-maiu tinan 2002, iha abut klean iha parseiru dezenvolvimentu dahuluk ne’ebé fó apoiu ba TL.

“Agradese ba Embaixadór Uniaun Europeia  foun iha TL, defende prinsípiu “Nasaun Rasik mak na’in, Nasaun rasik mak Lidera, no Uza Sistema Nasaun nian rasik” Kooperasaun atuál foka ba diversifikasaun no kresimentu ekonómiku, boa governasaun, dezenvolvimentu verde no sustentável, inkluzaun sosiál, no integrasaun rejionál, notavelmente liuhusi apoiu ba Timor-Leste nia adezaun ba ASEAN no Organizasaun Mundiál Komérsiu”, Dehan PR lihusi Komunikadu, iha Palásiu Prezidensiál Nicolau Lobato, Dili, 15/09.

Prezidente Republika hatutan tan, Embaixadór foun, Thorsten Bargfrede, nu’udar diplomata ida ne’ebé iha esperiénsia ho kareira distintu iha Servisu Asaun Esterna Europeu nian. Embaixadór lori esperiénsia barak husi kargu xave sira iha Sri Lanka, Maldivas, Kénya, Pakistaun, no Bruxelas, ho foku ba asuntu polítiku sira, planeamentu estratéjiku, no kooperasaun dezenvolvimentu.

“Espresa ninia konfiansa katak Embaixadór nia esperiénsia diplomátika ne’ebé extensivu sei kontribui signifikativamente ba aprofundamentu ligasaun bilaterál sira. Uniaun Europeia sai hanesan parseiru ne’ebé metin dezde momentu sira uluk liu iha ita-nia nasaun nia renasimentu. Ita-nia parseria, ne’ebé baseia ba rezpeitu mútuu no valór sira ne’ebé fahe ba malu, kontinua fó kbiit ba ita-nia instituisaun no ita-nia povu”, Tenik PR.

Entretantu, apoiu husi UE nian fundamental tebes ba luta ba reziliénsia ekonómika, integrasaun rejionál, no futuru sustentável ba Timor-oan sira hotu. Ita hein atu servisu hamutuk ho Embaixadór Bargfrede, hodi hametin liután aliansa importante ida-ne’e. Projetu oioin ne’ebé hala’o hela hetan apoiu husi Ekipa Europa no dezeja ba Embaixadór foun ho mandatu ida ne’ebé susesu no produtivu iha Timor-Leste.

Jornalista : Asessu husi Komunikadu iha pajina Palasiu Prezidente

Editor      :  Média RKDTL