EUTL LA KONKORDA HO DESIZAUN SOSA KARETA PRADO FOUN BA DEPUTADU 65

Dili-05/09/2025-Média Defisensia, Estudante Universidade iha Timor Lorosa'e (EUTL), konklui Komunikadu, tanba la konkorda ho desizaun Deputadu sira nian, iha Parlamentu Nasional, hodi sosa kareta luxu ba deputadu 65 hodi utiliza ba halo fiskalizasaun iha baze.

Porta vos Estudante Universidade Timor-Lorosa’e, Natalizio Nunes hatete, lamenta ho diskorda PN atu sosa kareta prado estudante nia observa politika sosa kareta luxu ba deputadu sira la'os foin, maibé sai hanesan ona kustume desde governasaun dahuluk to'o mai Nonu Governu  Parlamentu nafatin ezije hola kareta luxu.

“Ami lamenta total ba politika Parlamento Nasional nian ne'ebe atu sosa kareta luxu ou prado ba deputadu 65. Tamba ita haree no observa politika sosa kareta prado ba deputadu sira la'os foin primeira vez, maibe sai hanesan ona kustume ka kultura desde governasaun dahuluk to'o mai Nonu Governu. La'os sosa de'it kareta prado, maibé simu subsidiu ojoin no direitu regalia sira hanesan, osan ba manutensaun, alojamentu, laptop, tratamentu saude, osan pulsa no seluk tan ne'ebe privileziu tebes ba deputadu sira iha parlamentu nasional. Durante ne'e ita hare'e, kada periodu gorvernasaun sempre troka malu, maibe deputadu sira la'os ona representante povu hodi koalia destinu ou moris diak povu nian, pelu kontráriu, sira koalia representa de'it siru nia partidu, sira nia grupu, sira nia an, sira nia familia no representa deit ema osan nain ka elite ekonómiku sira”, Dehan Porta Voz iha konferensia imprensa iha resintu kampus Sentral  UNTL, 03/09.

Porta Voz Salienta tan, EUTL husu PN hapar Sosa Viatura, bainhira reprezentante kontinua sosa sira sei mobiliza halo asaun pasifika hasoru Deputadu sira iha Parlamentu Nasional.

“Ami husu ba Parlamentu Nasional liu-liu komisaun relevante katak, presiza tetu didiak antes preve orsamentu ba sosa kareta prado ba deputadu sira, tamba ita haree montante osan ho kustu ne'ebe boot tebes, ida ne'e bele aloka fali ba nesidade seluk povu nian, labele gasta deit osan povu nian ba privileziu individu. Hare'e ba politika ne'ebe la nesesariu tebes atu hola kareta prado. Konsidera desizaun politika ba sosa kareta luxu ne'e ironiku tebes, ida ne'e bele konsidera hanesan alokasaun fundu ne'ebe la nesesáriu. Tamba fundu supostu bele aloka ba programa kombate kiak, melhora infraestrutura. Desizaun sira ne'e hatudu momos diferensa sosial ne'ebé bo'ot tebes entre elite politiku sira no povu iha rai ida ne'e. Labele halo desizaun ne'ebe fó benefisia de'it ba interese grupu partidu familia. Tenke hatur kapasidade no responsabilidade moral hodi rezolve problema sira ne'ebé agora dadauk akontese iha estadu ne'e. Ba deputadu sira hodi ejize ba governu atu halo idemizasaun ba populasaun neʼebé hetan eviksaun forsada. Parlamento Nasional halakon tiha lei pensaun vitalisia ne'ebée la fó benefisiu ba povu, maibé fó bokur deit bá ema balun de'it. PN altera tiha lei manifestasaun liu klaúzula ida kona-ba restrisaun 100 (cem) metros. Politika PN nian ne’ebé aprova orsamentu privativu ho montante milaun $4.2 hodi sosa kareta unidade 65 ba deputadu sira no ami reafirma pozisaun dala ida, atu deputadu sira kansela ona orsamentu privatibu ba sosa kareta prado”, Tenik Porta Voz EUTL.

Porta Voz rekomenda Parlamentu Nasional, atu hasai direitu regalia sira ne’ebé mak parlamentu nasionál liu husi deputadu sira hatur ona iha lei, hanesan osan ba manutensaun, alojamentu, laptop, tratamentu saude, osan pulsa no seluk tan ne’ebe privileziu tebes ba deputadu sira iha Parlamentu Nasional. Husu atu altera lei nú 1/2006, ko’alia kona-ba manifestasaun liu-liu iha klaúzula ida kona-ba restrisaun 100 (cem) metros, tanba ida ne’e iha tendensia atu hamate demokrasia.

Entretantu, iha Komunikadu ne’e Estudante husi universidade UNDIL, UNTL, UNITAL no UNPAZ ne’ebé hamahan an iha asosiasaun Estudante Universidade Timor Lorosa’e (EUTL) hodi fó ultimatu ba Parlamentu Nasional relasiona ho sosa kareta luxu.

Jornalista  : Geraldino Magno

Editor        :  Média RKDTL