AEAL-TL LOKE FORMASAUN BA ESTUDANTE LIVRE TEORIA HUSI AREA SAUDE BA FULAN 3

 

Dili-15/08/2025-Média Defisiensia, Asosiasaun ema Afeta Lepra Timor-Leste (AEALT-L) kontinua loke formasaun moras lepra fulan 3 ba estudante husi area saúde nian ne’ebé livre ona teória.

Ba Média RKDTL Sesta-Feira ne’e Programa Menejer AEAL-TL Ermelinda Barros iha nia kna’ar fatin hatete, formasaun refere hanesan programa anual ne’ebé Asosiasaun iha kontinua husi tinan kotuk.

“objetivu ba loke kursus ne’e, hanesan parte ida husi asosiasaun nia programa anual ne’ebé mak tinan kotuk ita loke ba loron ida de’it, ba formasaun moras lepra ninian ba estudante sira ne’ebé mak eskola iha area saúde nian. Tinan ida ne;e ita simu rekomendasaun, husi tinan kotuk nian katak formasaun tinan kotuk nian loron ida de’it la adekuadu ba sira entaun sira hakarak atu loke tempu ne’ebé mak kleur, entaun tinan ne’e asosiasaun ema afeta lepra iha hanoin atu loke formasaun durante fulan 3, mais ba estudante sira ne’ebé mak iha area saúde ninian no sei estájiu dala rua iha terenu,” dehan Ermelinda iha kna’ar fatin Office AEAL-TL suku Bemori Postu Administrativu Nain Feto Munisípiu Dili 15/08.

Nia hatutan, liu husi fromasaun ne’e bele kapasita no aumenta estudante sira nia koñesimentu kona ba moras lepra nian, tanba maioria estudante sira husi area saúde ne’e aprende materia lepra ne’e jerál de’it.

“objetivu husi kursu ka formasaun ne’e maka atu hasa’e koñesimentu estudante sira nian liu-liu liga ba moras lepra, maioria estudante sira ne’ebé eskola iha universidade sira hotu iha area saúde nian, material lepra ne’e hanesan material jerál de’it, la espesífiku hanesan ne’ebé mak nesesita duni par atu halo detensaun ba kazu moras lepra iha teritóriu, entaun formasaun ida ne’e atu tulun estudante sira nia koñesimentu ba moras lepra, liu-liu hare ba detensaun kazu sedu ba moras lepra ne’e rasik,” hakotu nia.

Fatin hanesan reprejentante kandidata ba formasaun refere, Nelia Fernandes hatete, motivu partisipa iha formasaun ne’e atu hasa’e koñesimentu liga ho moras lepra ne’e, atu nue’e sei kontinua habelar informasaun sira ba komunidade sira.

“motivasaun saida mak ha’u hakarak mai tuir formasaun ida ne’e, ida ne’e sai hanesan bukae ida mai ha’u no bele gia ha’u karik iha futuru oin karik iha hanesan moras lepra, liu-liu afeta iha komunidade sira ida ne’e sai hanesan bukae ida karik ha’u remata husi ida ne’e ha’u bele aplika ka espalla informasaun ne’ebé mak ha’u hetan ba iha komunidade sira,” tenik nia.

Entretantu kursu ka formasaun refere loke ba estudante sira ne’ebé livre ona teória ka akaba ona sira estudu iha area saúde nian, no formasun refere sei simu ema ho limitadu tanba kestaun ba fatin.

Nune’e durasaun ba formasaun refere sei hala’o ba fulan 3, teória fulan ida, prátika iha terenu fulan rua, no formasaun ne’e kada semana, tuir oras 2 nian laran.

Aleinde ne’e formasaun ne’e realiza tanba Asosiasaun hetan apoiu fundus ki’ik ne’ebé Asosiasaun Defisiensia Timor-Leste (ADTL) aloka ba iha Membru Organizasaun Defisiensia.

Jornalista                             : Alexandre

Editór                                     : Média RKDTL