SEXU LIVRE BELE DESTROI ITA NIA SAUDE IHA FUTURU MANEIRA DIAK MAK PREVENE ANTES

 

Dili-09/07/2025-Media Defisiensia,  Institutu Nasionál Kombate HIV-SIDA, I.P. sosializa informasaun ba komunidade no joven sira iha Suku Comoro, relasiona ho Timor-Leste rejista   jovens hamutuk 2.300 i tal husi idade 15-24 maka afeta moras HIV-SIDA. Kazu ne’e kontinua aumenta tanba menus informasaun ba komunidade liuliu ba jovens sira.

Diretora Nacional Promosaun Prevensaun no Komunikasaun, Angelica da Costa Soares  hatete, objetivu husi institute Nacional kombate SIDA (INKSIDA), atu   sensibilizasaun  informasaun ba publiku kona-ba risku virus HIV-SIDA. Tanba jovens barak maka menus informasaun hodi abandona sira nia vida ikus sai risku ba moras HIV-SIDA.

“Sensibilizasaun  foka liu ba komunidade jeral nune’e bele hatene karik moris iha risku nia laran, atu bele hakbesik ba fasilidade saúde hodi bele halo teste ba ran katak deskonfia moras HIVSIDA. Treinamentu  refere hala’o nafatin tanba informasaun ne’ebe fo sai ona dalaruma komunidade sira haluhan, entaun tenke repete nune’e sira bele hanoin nafatin hahalok ne’ebé durante  sira komete ona agora sira bele tau ona ba iha konsiénsia”, Dehan Diretora Nacional Promosaun Prevensaun no Komunikasaun, iha Sede Suku Comoro, Dili, 09/07.

Diretora ne'e esplika husu ba komunidade sira liuliu ba jovens sira,  karik eskola hela fo tempu ba eskola, atinji tiha ita nia mehi, hafoin hanoin atu forma familia. Di’ak liu prevene no kontrola aan hodi labele halo relasaun seksual arbiru.

Iha fatin hanesan, Xefe Suku Comoro, Elijio José Marcal  hatete, sente orgullu ho prezenja INCSIDA ne’ebé Sensibilizasaun ona informasaun ba komunidade sira iha suku Comoro, atu nune’e bele menus virus refere iha komunidade nia leet.

“Sensibilizasaun informasaun ne’ebe INCSIDA fasilita iha suku Comoro ne’e importante tebes ba komunidade sira tanba husi  informasaun ita asesu husi sentru saude  katak jovens barak  maka  afeta moras  HIVSIDA iha Timor-Leste. Tanba ne’e husi ekipa INCSIDA halo sosializa informasaun refere sente orgullu ho sira nia prezensa nune’e bele halo koperasaun di’ak liu tan. Ami nafatin husu sira atu bele sosializa nafatin informasaun  ne’e ba komunidade sira” tenik Autoridade Lokal Suku Comoro

Autoridade salienta, husu ba jovens sira hatene aan, tanba jovens sira hatene katak seksu ne’e di’ak maibe virus ne’e todan bele habadak ita nia vida jovens, husu atu kopera rona informasaun sira nune’e bele evita aan iha futuru.

Tuir Koordenador HIV-SIDA Municipio Dili Doutor, Ijido Pinto dehan, durante ne’e Ministeriu  Saude simu dadus husi sentru saude tinan ne’e, iha Dili laran kona-ba virus HIV-SIDA barak tebes.

“Ami simu dadus husi Sentru Saude hahu Janeiru to’o fulan Juñu sira mak hanesan sentru Becora kazu 20, iha sentru saude Comoro 66 kazu, sentru saude  vera cruz 63 sentru saude  metinaru 3 no sentru saude formoza 234 maka afeta virus HIV-SIDA. Total  husi Timor-Leste kazu HIV-SIDA 2.300 tal”, Tenik  Koordenador HIV-SIDA Municipio Dili.

Jornalista : Geraldino Magno

Editor       : Média RKDTL