FOKUPERS HAMUTUK HO REDE REFERAL KONKLUI DISKUSAUN AMIGAVEL RELASIONA HO KAZU INFANTESIDU KONTINUA AAS

 

Dili-16/05/2025-Média Defisensia, Forum Komunikasaun ba Feto Timor-Leste (FOKUPERS), hamutuk ho rede referal sira, konklui atividade diskusaun amigavel relasiona ho numeru violensia no kazu infantesidu kontinua aas iha Timor-Leste.

Diretora Jeral FOKUPERS, Domingas Afonso Amaral hatete, atividade diskusaun amigavel ida-ne’e hodi komemora loron restaurasaun independensia TL ba dala 23, haree ba kazu violensia no kazu infantesidu kontinua aas iha rai-laran. Fokupers konvida organizasaun no rede referal sira atu bele halo reflesaun hamutuk ba kazu kona-ba maluk feto sira kontinua sai vitima ba kazu Violensia no Infantesidu.

“Ami iha inisiativa hala’o diskusaun amigavel ba loron Restaurasaun Independensia TL ba dala 23, ita hanoin katak numeru violensia kontinua aas liuliu kazu infantesidu kontinua aas ho ida ne’e ami interesante atu bolu organizasaun hotu, mai hamutuk hodi haree tanba sa kazu infantesidu kontinua nafatin akontese no feto sira nafatin sai vitima ba iha kazu sira bainhira akontese. Ita hotu ohin envolve iha parte diskusaun ne’e atu kontinua halo analiza kritiku liutan haree ba situasaun ida agora, serake ita nia enkuadramentu legal sira ne’ebé iha naton ona atu responde ba situasaun ne’e galae. Ita mai halo reflesaun hamutuk  ita mós konsidera katak  media mós durante ne’e hola parte ba papél importante atu bele fahe informasaun, halo advokasia iha públiku kona-ba situasaun no saida mak feto sira hasoru ba iha konstrusaun estadu ne’e. ami haree diskusaun ne’e hamosu ona ezersisiu balun ba ita hotu, ba oin ita kontinua  diskute atu ema hotu bele konsidera papél atu haree ba situasaun moris ne’ebé  di’ak liu ba feto no labaraik ne’e la’os organizasaun ida rua de’it  no Fokupers de’it, maibé papél ema hotu-hotu  hahu kedas husi ita nia an rasik hafoin ba familia sosiadade no ba nasaun”, Dehan Diretora Fokupers iha Salaun Fokupers Farol Dili, 16/05.

Hatutan Diretora Fokupers, katak diskusaun ida-ne’e tau hanoin hamutuk no hetan rezultadu sei halo relatoriu no apresenta ba Konsellu Ministru, tanba FOKUPERS hanesan membru konsellu interministerial  ba implementasaun PAN-VBJ iha TL.

“Husi rezultadu ne’ebé iha ami sei fahe fila fali relatoriu no hanoin ne’ebé ita tau hamutuk ba oin sei haree, hodi kontinua diskusaun sira no reforsa liutan  Fokupers  nia relatoriu ba iha pilar servisu apoiu sosial ba labarik no labarik feto. Ami rasik hola parte hanesan membru konsellu interministerial ba iha implementasaun planu asaun nasiona VBJ ita konsege halibur informasaun sira, hodi relata relatoriu ba iha implementasaun PAN VBJ nian, tanba ita hotu hatene depois relatoriu sei apresenta ba Konsellu Ministru”, Tenik Diretora FOKUPERS.

Entretantu, dadus trimestral datoluk Fokupers konsege rejistu kazu hamutuk 88 ba Violensia Bazeia ba Jeneru sira ne’ebé asesu ba uma mahon,  ita mós alerge vitima sobrevivente VBJ iha mós dependensia sira ne’ebé akompaña hanesan familia husi sobrevivente sira, oan sira no inan sira balu sira mós asesu ba uma mahon. Tuir dadus Janeiru to’o  Marsu ita iha labarik sira ne’ebé   rejistu hamutuk 28 labarik hela hamutuk iha uma mahon. Prosesu sira hanesan bainbain kuandu feto maluk sira sente la seguru no presiza apoiu ba uma mahon atividade lubuk ida mak FOKUPERS halo iha uma mahon primeiru fó akonsellamentu psikolojia ba sira, halo empoderamentu ba feto maluk sira no liuliu rekopera fali sira husi problema ne’ebé sira hasoru no asesu ba tratamentu saude, ba prosesu justisa. Tanba servisu hamutuk ho ALFELA, JSMP no Polisia BPU sira hodi lori prosesu sira ba iha prosesu legal nian.

Jornalista  : Geraldino Magno

Editor  : Média RKDTL