ASESSÓR SOSIADADE SIVIL ASP HO PRADET VIZITA EMA HO DEFISIENSIA PSIKOLOJIA IHA ERMERA

Dili-06/02/2025-Média Defisiensia, Asessor Sosiadade Sivil Apoiu Sosiál Prezidente hamutuk ho Psychosocial Recover and Development in East Timor (PRADET) hala’o vizita ba ema ho defisiensia psikolojia ida iha Suku Terlelo Munisipiu Ermera hodi haree direta nia kondisaun saude.

Asessor Sosiadade Sivil Apoiu Sosiál Prezidente Quintiliano Moniz hatete, atividade vizita ne’e hanesan parte ida hodi buka hatene loloos kondisaun Juliao Romerio,  nian, nune’e bele transfere mai Dili hodi ba halo tratamentu iha uma mahon Laklubar.

“Iha vizita ne’e bazeia ba pedidu husi inan aman husu alin ne’e moras dadauk ba iha Sua Exselénsia Prezidente rasik halo despaisu hakerek urjente halo koordenasaun ho Ministériu Saude liuliu PARADET oinsa  bele vizita hodi haree to’ok nia kondisaun. Nune’e bele lori ba halo tratamentu iha Dili no lori liu ba uma mahon iha Laklubar, agora ita atu transporta ba Dili depende  husi  rezultadu mediku sira karik ita bele lori agora bele iha prosesu tuir mai halo tratementu iha Laklubar”, Dehan Asessór Sosiadade Sivil ASP  Quintiliano iha Suku Terlelo, Postu Atsabe, Munisipiu Ermera, 03/02.

Asessor Sosiadade Sivil Apoiu Sosiál Prezidente esplika tan atividade ohin halo vizita ba EhD Psikolojia, observa mós projetu Igreja ne’ebé sarani sira kria no halo kontribuisaun rasik no husu Prezidente nia apoiu, vizita mós labarik nain haat ne’ebé inan-aman husik hela sei kiik  husu Prezidente Republika nia apoiu nesesidade baziku ba sira nain haat no harii uma ba sira.

Entretantu, Orsamentu ki’ik maibe halo liu fali orsamentu ne’ebé ita apoiu tamba orsamente ne’ebé uluk ita apoiu 3 mil dolar. Agora iha futuru  mai ohin kan barak laos ida ne’e deit iha munisipiu hira ne’e ita kuase apoiu ona iha 2022,2023 no 2024 kuase 50 i tal grupo iha munisipiu sira apoiu iha balun halo kritika dehan katak iha bengkel, hakiak animal, hanesan balun hakiak dadaun ikan ita apoiu balun ne’ebé kuandu la halo ne’e, ita la halimar iha tempu barak ekipa ida sei tun halo observasaun ba apoiu hirak ne’ebe husi Prezidente Repúblika.

Iha fatin hanesan Konselor PRADET Silvina Dulce dos Santos, akresenta kliente refere hetan tratamentu husi parte saude, maibé to’o agora sedauk diak tanba presiza servisu hamutuk ho familia, hodi lori kliente mai halo tratamentu iha uma maho Laklubar.

“Vizita kliente ne’ebé antes ita halo ona asessmentu no husi parte saude sira mai halo sira nia servisu fó hela ai-moruk familia sira mós kontribui foti hela ai-moruk ba kliente refere ita nia problema ida ne’ebé halo susesu ne’e menus no ki’ik  nia afeta mai husi kliente ne’ebé ki’ik halo tinan haat nia iha hela problema isin manas makas. Tuir informasaun familia dehan iha fulan ne’e nia laran kliente ataka hela de’it, monu entaun bolu dehan mate ki’ik kona hela de’it kliente nia tinan haat mai ne’e kliente ninia mudansa ba progresu fiziku no mental ne’e afetadu ona ninia memoria no hanoin hotu laiha balansu to’o kliente ko’alia lasai husi nia ibun hakilar, nonok mak mosu ona ba nia, ikusmai halo tratamentu nia kontinua mós hetan agresividade hanesan hakilar ita presiza ajuda nia hamenus nia hakilar entaun presiza saude fó tratamentu”, Subliña Konselor PRADET.

Tuir Autoridade Lokal suku Terlelo Mariano Gonçalves de Araújo, apresia ba Prezidente Republika liuhusi Gabinete Prezidente no PRADET bele tun direta ba vizita benefisiariu ne’ebé hetan moras Psikolojia makas tebes, hodi bele fó apoiu no buka dalan atu transfere ba Dili hodi fó tratamentu ba benefisiariu.

“Sente orgullu no kontente tebes tanba durante tinan barak ona mak ami hein prezensa husi PRADET husi parte Gavinete Prezidente nian ne’ebé diretamente mai to’o iha ami nia suku no aldeia, hodi mai hare diretamente ami nia benefisiariu ne’ebé maka ho kondisaun ita bele dehan grave tebes, nu’udar Autoridade sente orgullu, tanba mai haree ami nia benefisiariu”, Tenik Autoridade Lokal suku Terlelo, Ermera.

Entretantu, Autoridade Lokal rekomenda ba parte relevante  Gabinete Prezidente nian atu bele apoiu nafatin labele hapara iha ohin loron, maibé nafatin tau matan ba sidadaun refere. Nune’e benefisiariu sira bele rekopera ninia saude, no buka  fatin ne’ebé dignu ba nia atu nune’e nia bele halo tratamentu ba ninia saude.

Jornalista : Aselmo Martins

Editor       : Média RKDTL