PM SEI IDENTIFIKA MUNISÍPIU HOTU ANTES REALIZA ELEISAUN BA GOVERNU LOKÁL

 

Dili-16/01/2025- Média Defisiénsia, Primeiru-Ministru (PM) Kay Rala Xanana Gusmão kinta ne'e hasoru malu ho Prezidente Repúblika (PR) hodi ko'alia kona-ba progresu Governu nian no iha fulan-marsu nia sei vizita Munisípiu hotu hodi halo identifikasaun antes realiza eleisaun ba Governu lokal.

"Enkontru semanál ho Prezidente Repúblika hodi relata progresu servisu sira ne'ebé ami halo, informa mós horseik iha Konsellu Ministru Governu aprova ona rejolusaun ida marka ona kalendariu ida hodi halo preparasaun ba eleisaun ba Governu lokal, maibé ita la'ós halo dala ida, fulan-marsu ba oin ha'u sei la'o ba Munisípiu hotu iha ona estrutura ne'ebé ho kapasidade tékniku no hatene kumpri di'ak prosesu hotu ita foin halo uluk eleisaun, hafoin ita hare’e fali Munisípiu seluk," PM hateten. (15/01).

Nia dehan, iha tinan 2025-2026 Governu sei halo preparasaun di'ak nune'e iha 2027 eleisaun ba Governu lokal la'o másimu ona no bele implementa ona desentralizasaun.

Projetu Rezolusaun Governu, ne’ebé aprezenta husi Ministru Administrasaun Estatál, Tomás do Rosário Cabral, ba ezekusaun Estratéjia Desentralizasaun Administrativa no Instalasaun órgaun reprezentativu podér lokál 2025-2028 nian, hetan ona aprovasaun hosi Konsellu Ministru kuarta ne’e.

Médida ida-ne’e ho objetivu atu reafirma Governu nia determinasaun hodi konsolida estratéjia desentralizasaun administrativa no kontinua prosesu instalasaun órgaun reprezentativu Podér Lokál nian.

Rezolusaun Governu ida-ne’e estabelese planu anuál sira, husi 2025 to’o 2028, ne’ebé inklui instalasaun servisu Balkaun Úniku iha territóriu nasionál tomak, reforsa institusionál autoridade munisípiu sira nian, regulamentu lei sira ne’ebé relasiona ho podér lokál no atualizasaun baze-dadus resenseamentu eleitorál nian.

 Iha etapa sira tuir mai, sei promove kriasaun kondisaun sira hodi hala'o eleisaun munisipál, kapasitasaun ba prezidente munisipál eleitu sira no avaliasaun ba progresu desentralizasaun nian.

Koordenasaun ba ezekusaun estratéjia sei sai hanesan responsabilidade Ministériu Administrasaun Estatál nian, ne’ebé tenke aprezenta relatóriu semestrál kona-ba progresu ne’ebé alkansa ona no dezafiu sira ne’ebé hasoru, hodi garante kontinuidade no efikásia prosesu nian.

Rezolusaun ida-ne’e revoga Rezolusaun Governu anteriór n. 45/2020, loron 9 fulan-dezembru, no tama iha vigór iha loron ida hafoin nia publikasaun.

Jornalista        : Anselmo Martins

Editor               : Média     RKDTL