Sorumutu Konsellu Ministrus nian iha loron 4 fulan-dezembru tinan 2024

 

Konsellu Ministrus hala’o sorumutu  iha Palásiu Governu, Dili no, aprova projetu Proposta Lei, ne’ebé aprezenta hosi Ministru Justisa, Sérgio de Jesus Fernandes da Costa Hornai, no hosi Koordenadora Grupu Traballu ba Reforma Setór Justisa, Lúcia Lobato, kona-ba alterasaun Dahuluk ba Lei n. 1/2017, loron 18 fulan-janeiru, Rejime Tranzitóriu Rekrutamentu Majistradu no Defensór Públiku sira ne’ebé la’ós timoroan no alterasaun daruak ba Lei n. 9/2011, loron 17 fulan-agostu, ne’ebé aprova orgánika Kámara Kontas Tribunál Superiór Administrativu, Fiskál no Kontas nian.

Entre alterasaun sira ne'ebé propoin maka revizaun hosi siklu kontratuál sira, ne'ebé agora sei dura ba tinan ida, bele renova ba de'it tinan ida tan, ho objetivu atu evita prolongamentu sira ne'ebé la nesesáriu no promove troka esperiénsia sira entre profisionál sira. Ba tribunál superiór sira, kandidatu sira pelumenus tenke iha esperiénsia tinan 20, inklui serbisu iha instituisaun internasionál sira ho funsaun hanesan ho ne’ebé iha Timor-Leste. Juiz, prokuradór no defensór públiku admitidu sira, iha situasaun exesionál, bele ezerse funsaun iha tribunál timorense, naran katak sira kumpre kondisaun espesífika sira, hodi garante kontinuidade justisa no evita kadusidade direitu fundamentál sira.

Rejime ida-ne’e atu garante kualidade no kontinuidade administrasaun justisa nian, apoia dezenvolvimentu no progresaun karreira majistradu timoroan sira nian no salvaguarda direitu no sidadaun sira-nia interese.

Aprova mós Projetu Dekretu-Lei, ne’ebé aprezenta husi Ministru Defeza, Donaciano do Rosário Gomes, kona-ba Promosaun exesionál ba Militár sira hosi FALINTIL-FDTL.

Diploma ida-ne’e ho intensaun atu dispensa rekizitu sira lisensiatura nian atu tama iha kategoria ofisiál no grau baxarél ka ensinu sekundáriu ne’ebé komplementa ho formasaun militár atu tama iha kategoria sarjentu. Desizaun ne’e ho objetivu atu rekoñese no asegura progresaun karreira hosi militár sira ne’ebé tama ona molok Estatutu Militár tinan 2014 nian tama iha vigór, hodi salvaguarda espetativa lejítima sira ne’ebé kria ona. Diploma ne'e sei prodús efeitu hahú iha loron 1 fulan-janeiru tinan 2024.

Konsellu Ministrus aprova projetu Dekretu-Lei, ne’ebé aprezenta mós husi Ministru Defeza, Donaciano do Rosário Gomes, kona-ba pagamentu suplementár ba militár F-FDTL no funsionáriu no ajente administrativu sira iha Ministériu Defeza ne’ebé envolve iha prosesu ba rekrutamentu espesiál tinan 2023.

Objetivu hosi medida ida-ne’e mak atu fó kompensasaun ba esforsu estraordináriu no rekoñese empeñu profisionál militár, funsionáriu no ajente administrativu sira nian ne’ebé partisipa iha prosedimentu rekrutamentu ida-ne’e. Pagamentu suplementár ne’e reflete dedikasaun ne’ebé hatudu ona ho objetivu atu hamenus kondisaun serbisu ne’ebé ezijente, inklui restrisaun ba liberdade pesoál no nivel penozidade ne’ebé aas kona-ba funsaun ne’ebé dezempeña.

Valór suplementu ne’e kalkula proporsionalmente, haree ba volume serbisu nian no oras serbisu ne’ebé realiza duni.

Aprova projetu Rezolusaun Governu, ne’ebé aprezenta mós husi Ministru Defeza, kona-ba Estratéjia Apoiu Umanitáriu no Emerjénsia nian.

Estratéjia ne’e promove orientasaun no liña asaun inovadora lubun ida ne’ebé ho objetivu atu otimiza kapasidade no prontidaun Forsa Armada (F-FDTL) sira nian, hodi garante resposta ida ne’ebé rápida, efikás no efisiente kona-ba nesesidade populasaun sira ne’ebé afeta husi situasaun umanitária no emerjénsia.

Iha ámbitu hosi Estratéjia ida-ne’e, aprova mós kriasaun Unidade ba Koordenasaun Apoiu Umanitáriu no Emerjénsia, ne’ebé tutela hosi Ministériu Defeza. Objetivu hosi unidade ida-ne’e mak atu implementa Estratéjia, hodi promove abordajen koordenada ida entre entidade públika oioin ho koñesimentu no esperiénsia iha setór ne’e.  Koordenasaun ne’e sei lidera husi personalidade ida ne’ebé nomeia husi membru Governu responsavel ba área defeza nian no sei konta ho reprezentante sira husi área defeza, administrasaun estatál, interiór, saúde no seguransa sosiál nian ne’ebé sei atua nu’udar pontu fokál. Regra husi organizasaun no funsionamentu ba Unidade Koordenasaun ne’e sei define liuhosi despaxu ministeriál husi Ministru Defeza.

Hafoin halo análize ba aprezentasaun husi Ministru Agrikultura, Pekuária, Peskas no Florestas, Marcos da Cruz, kona-ba rezultadu relatóriu auditoria ne’ebé hala’o iha Inspesaun-Jerál Estadu (IGE, sigla iha lian portugés), ne’ebé avalia ona regularidade, legalidade no konformidade kontratu ba subvensaun públika ne’ebé selebra iha tinan 2022 entre Ministériu Agrikultura no Peskas (MAP) iha tempu ne’ebá, ne’ebé daudaun ne’e sai hanesan Ministériu Agrikultura, Pekuária, Peskas no Florests (MAPPF), no entidades Asosiasaun Kafé Timor (ACT, sigla iha Lian Portugés) no Kooperativa Kafé Timor (CCT, Sigla iha Lian Portugés), Konsellu Ministrus aprova projetu Rezolusaun Governu ne’ebé inkorpora rekomendasaun prinsipál sira kona-ba relatóriu ne’e.

Relatóriu ne’e aprezenta rezultadu análize ba kontratu subvensaun ne’ebé ho objetivu atu halo reabilitasaun no expansaun ba plantasaun kafé, relatóriu sira ne’ebé submete no dadus ba benefisiáriu sira, ne’ebé abranje tinan 2022 no 2023 nian. Deskobre katak laiha kontratu analizadu ida mak implementa iha ninia totalidade, haree ba meta sira ne’ebé estabelese ne’e la kumpre ho kompletu.

Rezolusaun Governu define obrigasaun atu reajusta verbas tuir persentajen ezekusaun kontratu nian, tenke fó filafali restu ne’e ba kofre Estadu.

Rezolusaun Governu determina mós katak Inspesaun-Jerál Estadu realiza averiguasaun adisionál ida hodi avalia regularidade, konformidade no legalidade utilizasaun nian, husi MAP, husi verba totál ne’ebé aloka hanesan subvensaun públika nian, hodi halo atividade reabilitasaun no expansaun kafé, ne’ebé la transfere ba benefisiáriu ruma, maibé uza no jere de’it husi servisu iha Ministériu refere ba atividade apoiu reabilitasaun no expansaun kafé no kafé LAKU TEN.

Ministru Juventude, Desportu, Arte no Kultura, Nelyo Isaac Sarmento, aprezenta ba Konsellu Ministrus relatóriu kona-ba partisipasaun iha Konferénsia Ministrus Juventude no Desportu Komunidade País Lian Portugés (CPLP, Sigla iha Lian Portugés) nian ba da-15, ne’ebé hala’o iha Cascais, Portugál , husi loron 12 to’o 16 fulan-novembru.

Konsellu Ministrus aprova projetu rezolusaun ne’ebé kria Komisaun Eventuál Interministeriál ne’ebé responsavel ba koordenasaun atividade sira relasiona ho realizasaun Konferénsia Ministrus Juventude no Desportu CPLP nian ba da-16 no Jogu Desportu CPLP nian ba da-12, ne’ebé sei hala’o iha Dili, hahú hosi loron 17 to'o loron 27 fulan-jullu tinan 2025. Ba organizasaun eventu sira-ne'e, aprova ona orsamentu ho montante dolar amerikanu 3.730.500.

Komisaun, ne’ebé prezide hosi Ministru Juventude, Desportu, Arte no Kultura, sei kompostu hosi reprezentante sira hosi ministériu oioin no sei iha apoiu hosi Unidade Téknika ida, responsavel ba preparasaun no implementasaun Planu Diretór ba eventu sira. Estrutura ida-ne’e sei koordena asaun sira iha área lojístika, komunikasaun, angariasaun fundu, no promosaun igualdade jéneru no inkluzaun sosiál, hodi garante koordenasaun interdepartamentál no komunikasaun efetiva ho delegasaun sira hosi nasaun partisipante sira.

Eventu sira sei halibur partisipante na'in-772, inklui delegadus no atleta sira hosi nasaun membrus CPLP nian, hodi promove kooperasaun, solidariedade no amizade entre povu luzófonu sira, liuhosi desportu no juventude. Komisaun ne’e sei disolve hafoin aprezentasaun relatóriu finál ba Primeiru-Ministru.

Konsellu Ministrus delibera hodi fó naran ba ponte foun Comoro Mota Ulun (Casnafar) ho naran Kofi Annan, Eis Sekretáriu-Jerál Nasoens Unidas.

Konsellu Ministrus aprova indikasaun ba naran sira ne’ebé sei nomeia husi Ministru Transportes no Komunikasoins, Miguel Marques Gonçalves Manetelu, ba Konsellu Administrasaun Autoridade Nasionál Komunikasoins (ANC, sigla iha lian portugés) nian.

Flavio Cardoso Neves sei hetan nomeasaun nu’udar Prezidente Konsellu Administrasaun. Novelino dos Santos no Georgina Emilia da Silva Garcia ida-ida sei asume kargu hanesan Administradór Tékniku no Finanseiru respetivamente. Roberto Manuel da Costa Martins no José Ave Maria Ximenes Cipriano Gonçalves sei hetan nomeasaun nu’udar Administradór Naun-Ezekutivu.

Ikusliu, Vise-Ministra ba Asuntus ASEAN, Milena Maria da Costa Rangel, aprezenta ba Konsellu Ministrus atualizasaun kona-ba prosesu adezaun Timor-Leste nu’udar membru plenu ba Asosiasaun Nasoins Sudeste Aziátiku (ASEAN), ne’ebé nia konkretizasaun prevee ona ba tinan oinmai.

Source: Sorumutu Konsellu Ministrus nian iha loron 4 fulan-dezembru tinan 2024 « Governu Timor-Leste