Gravasaun Programa “Página do IX Governo Constitucional”, ne’ebé sei fó-sai iha tempu badak iha RTTL no Rede Sosiál sira

 

Governu fó-sai gravasaun ba epizódiu dahuluk hosi programa entrevista “Pájina Governu Konstitusionál da-9 nian”, inisiativa ida ne’ebé promove hosi Ministru Prezidénsia Konsellu Ministrus, Agio Pereira, iha nia knaar nu’udar Portavós Governu nian no iha parseria ho Rádiu-Televizaun Timor-Leste (RTTL). Konta mós ho apoiu tékniku hosi ekipa mídia sira hosi Gabinete Primeiru-Ministru, Prezidénsia Konsellu Ministrus no Ministériu Obras Públikas. Programa ida-ne’e ho objetivu atu kria plataforma ida ba komunikasaun direta entre Governu no sidadaun sira, hodi promove transparénsia no diálogu kona-ba inisiativa no prioridade prinsipál sira governu nian.

Modera hosi Nélia Chaves no prodús hosi Ika Moniz, “Pájina Governu Konstitusionál da-9 nian” sei hetan, iha ninia epizódiu dahuluk, partisipasaun hosi Ministru Obras Públikas, Samuel Marçal, ne’ebé sei aprezenta planu no atividade sira Governu nian iha setór infraestrutura – área estratéjiku ida ba dezenvolvimentu sustentável nasaun nian.

Governu Konstitusionál da-9 fó ona prioridade ba revitalizasaun infraestrutura nasionál, ho énfaze ba inisiativa sira hanesan konstrusaun no reabilitasaun estrada no ponte sira, ne’ebé fundamentál atu hadi’a konektividade nasionál. Aleinde ne’e, Governu investe ona iha reforsu muru sira hodi proteje mota, drenajen no valeta sira iha rejiaun oioin iha país ne’e, liuliu atensaun ba mitigasaun risku sira inundasaun nian. Iha tempu hanesan, projetu abastesimentu bee no manutensaun ba rede eletrisidade nasionál la’o hela, ho objetivu atu garante kualidade servisu ba sidadaun hotu-hotu.

Kompromisu ida-ne'e reflete iha Orsamentu Jerál Estadu ba tinan 2025 (OJE 2025) nian, iha ne'ebé Primeiru-Ministru, Kay Rala Xanana Gusmão, destaka katak “investimentu iha infraestrutura la’ós de’it atu halo konstrusaun ba estrada no ponte sira – maibé mós atu liga ita-nia povu, hodi bele halo komérsiu no promove oportunidade sira”.

Ministru Agio Pereira subliña katak “ho programa ‘Pájina Governu Konstitusionál da-9 nian’, Ezekutivu ne’e reafirma ninia kompromisu prosimidade ba sidadaun sira, hodi garante asesu ba informasaun detalladu no atualizadu kona-ba asaun no prioridade sira Governu nian”.

Epizódiu dahuluk sei fó-sai iha tempu badak iha RTTL no iha rede sosiál ofisiál sira Governu nian. Ministru Agio Pereira konvida “populasaun tomak atu akompaña espasu ida-ne’e ba diálogu no transparénsia, ne’ebé ho objetivu atu hakbesik Governu ba sidadaun sira no promove fahe informasaun ho dalan ne’ebé klaru no objetiva”.

Source: https://timor-leste.gov.tl/?p=41060&n=1&lang=tp