SENTRU SSK TILOMAR MENUS FASILIDADE HODI FÓ PARTUS BA INAN ISIN RUA

 

KOVALIMA-11/12/2024-Media Defisiensia, Sentru Saúde Komunitáriu (SSK) Tilomar iha fulan rua ikus ne'e, iha Postu Administrativu Tilomar, Munisipiu Kovalima, preokupa ho fasilidade kama atu fó partus ba inan isin rua.

Tuir Parteira iha Sentru Saúde Komunitáriu(SSK) Tilomar, Beatriz Nunes afirma, durante ne'e atendimentu lao normal, maibé ekipamentus menus liu-liu fasilidade sira hodi fó atendimentu ba pasiente sira.

"Ha'u foin muda mai iha ne'e fulan rua, kama partus iha ne'e ida de'it. Kama partus  ne'e mós agora daudaun a'at tiha ona. Fasilidade importante mak kama partus nian, hela ida de'it, no nia kondisaun mós aat ona. Bainhira inan sira mai na'in rua ka tolu iha loron ida de'it ne'e difikulta tebes ba ami,tamba kama partus ida deit”, Dehan Parteira Beatriz iha  Sentru Saúde Komunitáriu, Tilomar, 09/12.

Hatutan Parteira Beatriz, maske nune'e, nia dehan, sira uza maneira ida ba inan ne'ebé nia oras besik ona mak uza kama partus nian, no ida ne'ebé sei kleur toba hein iha kama seluk hanesan kama vasina nian.

"Ami uza maneira ida ba inan ne'ebé nia oras besik ona atu partu mak uza uluk kama partus , no ida ne'ebé sei kleur toba hein iha kama seluk hanesan kama vasina nian. Durante ne'e ami rejistu inan isin rua iha ne'e hahú husi Janeiru too dezembru  rejista hamutuk 176 ne'e mak partus iha SSK ne'e no kada fulan rejistu inan isin rua hamutuk 82", Nia Afirma.

Iha fatin hanesan, Diretór Servisu Saúde Munisipiu Kovalima, Domingos Siqueira rekoñese menus ekipamentu ne'ebé akontese iha fasilidade saúde  ne'e loos duni. Sentru saúde ne'ebé mak sei menus hela fasilidade no iha ona planu hodi bele kompleta fassilidade hirak ne'e.

"Agora daudaun ita halo hela pedidu balun, ita atende ona, pur ezemplu hanesan Sentru Saúde Zumalai, ita atende ona. Ita haree ba Sentru Saúde sira ne'ebé mak partus barak liu. Ita atende uluk ba sira, maibé Sentru Saúde sira ne'ebé mak menus, ita sei la haluha maibé tau tiha ona ba planu para bele kompleta, no  pedidu ne'e  haruka ona ba iha Ministériu Saúde iha fulan kotuk ne'e", Tenik Parteira.

Jornalista    : Anselmo Martins

Editor         : RKDTL