SENTRU NF DISTRIBUI SERTIFIKADU LIAN INGLÉS BA FORMANDU 61

 Dili-19/12/2024-Média Defisiensi, Sentru Naroman ba Futuru distribui sertifikadu formasaun   lian Inglés ba formandu 61 ne’ebé durante ne’e tuir hela teste iha SEFOPE.

Diretor Ezekutivu Sentru Naroman ba Futuru Jonni Carvalho, hatete Sentru naroman ba futuru ohin konklui ona formasaun lian ingles ba kandidatu traballadór sira, durante tuir teste iha SEFOPE, maibé sira nia valor menus, tanba ne’e SEFOPE fó oportunidade ba sira atu kursu hodi bele aumenta lian Inglés hafoin apresenta an ba SEFOPE.

“Ami loke oportunidade ba kandidatu sira ne’ebé durante ne’e tuir hela teste iha SEFOPE entaun sira iha valor mak, sufisiente, poor, very poor entre sira ne’e kandidatu ne’ebé mai rejistu iha formasaun ne’e hamutuk 84 maibé sira 61 mak remata sira nia Kursu lian Ingles no sira mai husi munisipiu diferente husi Viqueque 26, Baucau 8, Bobonaro 6, Dili 6, Lautem 4, Covalima 4 No Atauru 1 husi total ne’e sira esforsu makas los no hatudu vontade atu bele hadia sira nia lingua ne’ebé SEFOPE fó oportunidade ba sira atu hetan hodi ba servisu iha Australia”, Dehan Diretor Jonni, iha Salaun AHISAUN 18/12.

Hatutan Diretor Sentru naroman ba futuru, agradese ba SEFOPE bele fó fiar ba sentru refere hodi fó formasaun ba kandidatu traballadór sira ne’ebé valor menus iha teste eskrita.

“Agradese ba SEFOPE liuliu ba director jeral ne’ebé fó oportunidade baa mi hodi fó formasaun Lian ingles ba joven sira ami fiar katak sira ne’ebé tuir kursu ne’e lori sira nia sertifikadu bai ha SEFOPE munisipiu ida-idak. Agradese wain ba formadór no formandu sira, durante sira nia kontribuisaun hakarak tebes atu hetan oportunidade hanesan ho maluk sira seluk ne’ebé hetan ona servisu iha Australia”, Deklara Diretor.

Iha fatin hanesan Diretor Jeral SEFOPE Carlito Rosario Cabral, afirma apresia no parabens ba sentru no formandu sira bele konklui ona kursu lian ingles ho diak tanba kapasita ona kandidatu traballadór sira hodi atinji kriteria sira ne’ebé SEFOPE oferese ba sentru sira.

“Oportunidade ne’e atu hato’o parabens ba formandu sira  ne’e atu ba servisu iha rai liur no sentru naroman ba future ne’ebé bele fasilita formasaun lian ingles bai ta nia kandidatus traballador sira ne’ebé tuir prosesu iha SEFOPE maibé sira nia valor sedauk too atu tama iha Sistema entaun iha fulan ida ne’e naroman ba future fasilita formasaun ba joven sira hodi fó Kurusu lian ingles ba sira nune’e bele hadia sira nia valor tuir kapasidade lian ingles nune’e sir abele ba servisu iha rai liur tuir kriteria no nesesidade empregadór sira iha railiur liuliu iha AUSTRALIA”, Subliña Diretor Jeral.

SEFOPE agradese no apresia ba sentru formasaun sira hotu, tantu públiku no privadu ne’ebé fasilita joven sira hodi tuir formasaun liuliu iha lingua nune’e joven sira bele kompete iha merkadu iha rai-laran no rai-liur.

Reprezentante formadu husi sentru Naroman ba Futuru, agradese ba SEFOPE fó ona oportunidade ba kandidatu traballadór sira atu tuir kursu, hodi priense kriteria sira ne’ebé iha bainhira sira konklui ona kursu lian ingles iha sentru sira.

“Agradese ba SEFOPE bele fó oportunidade ba ami ne’ebé hetan valor sufisiente, poor no very poor atu tuir kursu hodi bele aumenta lian ingles dal aida tan agradese tebes ho oportunidade ne’e ami bele aumenta ami nia eskil iha lian ingles nune’e ami bele apresenta aan ba SEFOPE katak ami konklui ona kursu no hetan setifikadu lian ingles”, Tenik Formadu.

 

Jornalista : Geraldino Magno

Editor       : Média RKDTL