PR NO PM DEZEJA NATÁL KMANEK BA POVU TL, HUSU JOVEN KRIA PÁS NO ESTABILIDADE

 

Dili-19/12/2024-Média Defisiensia, Prezidente Repúblika Demokratika Timor-Leste no Primeiru Ministru dezeja natál kmanek ba povu Timor-Leste hotu no husu joven sira kontinua mantein pás iha rai laran.

Prezidente Republika José Ramos-Horta hatete, hanesan orgaun estadu nian hato’o natal kmanek ba familia iha rai-laran atu mantein pas no familia sira rai-liur.

“Ha’u hamutuk ho Primeiru-Ministru ami nu’udar orgaun Estadu no lider nasionál, hakarak hato’o ami nia votus natál kmanek ba família sira hotu iha Timor-Leste no balu iha rai-liur ne’ebé ba buka moris, ba eskola,” Dehan PR iha Palásiu Prezidensiál, 19/12.

Hatutan Prezidente Horta fó mós votus natál ba timoroan hirak ne’ebé moras baixa hela iha Ospitál no balu ne’ebé dadur hela iha Prizaun Becora Dili, Gleno Ermera no Covalima atu forsa nafatin.

“Hakuak boot ba imi hotu ne’ebé moras iha hela Ospitál, ba imi sira ne’ebé iha Prizaun, forsa nafatin, natal kmanek no haksolok tinan foun ba imi hotu, fiar katak iha tinan foun sei hetan baut di’ak barak liu”, Salienta PR.

Iha fatin hanesan Primeiru-Ministru Kay Rala Xanana Gusmão afirma, dejesa natal kmanek b aba povu tomak iha Timor-Leste liuliu joven sira atu kria pas no estabilidade iha rai-laran.

“Hakarak dezeja natál kmanek ba povu tomak, liuliu ba joven sira, kria pás ba iha ida-idak nia aan atu kontribui ba dezenvolvimentu”, Subliña PM.

PM akresenta tan katak, tinan kotuk joven sira kria ona pás tanba laiha konflitu durante festeza natál no tinan foun, husu joven sira nafatin mantein pás hanesan tinan sira liu ba, nune’e bele hatudu ba mundu katak pás iha imi joven sira nia liman.

“Iha tinan kotuk ita hotu kontente tebes tanba iha periudu natál no tinan foun la akontese buat ida. Ha’u hanesan Primeiru-Ministru fiar katak joven sira iha Bairru-Bairru ita tenke ka’er tuir mensajen Amu-Papa nian, hosi ne’e imi rasik mak hatudu ba mundu katak pás iha imi joven sira nia liman, iha imi nia ulun no iha imi nia hahalok. Kontinua imi nia pás ne’e iha natál no tinan foun ida ne’e”, Tenik PM.

Jornalista : Anselmo Martins

Editor       : Média RKDTL