UNICEF APOIU EKIPAMENTUS TEKNOLOJIA BA MINISTÉRIU EDUKASAUN

 

Dili-17/12/2024-Média Defisiensia, UNICEF entrega ekipamentus Teknologia Informasaun Komunikasaun (TIK), ho valór $198,430 (Dollar Amerikanu Rihun Atus Ida Sia-Nulu Resin Ualu, Atus Haat Tolu-Nulu) ba Ministériu Edukasaun, hodi apoia esforsu atuál sira iha prosesu ensinu no aprendizajen Timor-Leste.

Ministra Edukasaun, Dulce de Jesus Soares hatete, ekipamentu Teknologia Informasaun Komunikasaun ne’ebé apoiu husi UNICEF ne’e signifikadu tebes,  hanesan investimentu ida iha futuru, esforsu hamutuk hodi sai hanesan ponte ba divizaun dijitál.

“Ekipamentu TIK ne’e iha signifikadu la’os de’it serimónia entrega rekursu sira ne’e hanesan investimentu ida iha futuru, esforsu hamutuk hodi sai hanesan ponte ba divizaun dijitál, enpodera manorin sira, no fó inspirasaun ba estudante sira sai di’ak liután iha mundu ne’ebé mak avansadu ho literasia dijitál no inovasaun no espera ida-ne’e sei ajuda hasa’e prosesu ensinu no aprendizajen ne’ebé sei resulta iha rezultadu aprendizajen estudante sira nian”, Dehan Ministra Edukasaun iha Salaun konferénsia ME, 17/12.

Hatutan Ministra Edukasaun, husu ba professór sira kuidadu material no ekipamentus sira ne’e, no uza ho responsavel, obriga estudante sira uza ho responsavel tau ekipamentus sira ne’e iha fatin seguru. Tanba ekipamentu sira ne’e sei kontribui atu hasa’e rezultadu aprendizajen husi estudante sira.

“Ekipamentus ne’ebé sei kontribui atu hasa’e rezultadu aprendizajen husi estudante sira iha nasaun ne’e inklui laptop 32, televizaun 31, tableta  300, jeradór 30 no projector 32. Ekipamentu sira ne’e sei fahe ba Eskola Ensinu Báziku 30 iha Ainaro, Ermera no Liquisa, ne’ebé benefísia to’o estudante 17,469 (rihun sanulu-resin hitu, atus haat neen nulu-resin sia), 90 joven sira ne’ebé para eskola no 659 profesór”, Afirma ME.

Iha fatin hanesan Patricia Digiovanni Representante  UNICEF, dehan  Ondra boot mai iha ne’e entrega ekipamentus Teknolojia, Informasaun, Komunikasaun ba Ministreiru Edukasaun entrega laptop, printer, jeradór, no ekipamentu esensiál sira seluk atu fornese ba estudante iha Timor-Leste. 

“Ita moris iha tempu dijitál nia laran, iha ne’ebé fasil atu hasa’e estudante sira nia aprendizajen no dezenvolvimentu abilidade liuhosi plataforma no aplikasaun dijitál sira. Iha mundu Tomak, teknolojia sira ajuda atu troka estudante sira-nia esperiénsia aprendizajen, liuhosi permite estudante sira aprende husi fatin naran de’it sira iha ba, fó asesu fasil ba rekursu aprendizajen, no fó oportunidade ba sira atu liga ho sira nia kolega iha mundu tomak”, Akresenta Rep. UNICEF

Hatutan Representante UNICEF ekipamentu TIK nian, profesór sira iha eskola ne’ebé benefísiu sei hala’o workshop hasa’e kapasidade, hodi ajuda sira nia abilidade no kompeténsia atu uza no hanorin uza ekipamentu sira ne’e.

“Hahú fulan Agostu 2024, UNICEF hamutuk ho INFORDEPE hala’o ona workshop prátiku sira atinji profesór 154 iha eskola 10 hosi eskola alvu 30. Profesór sira sei fó formasaun ba sira nia kolega iha sira nia eskola no mós introdús abilidade kritika ba sira nia estudante sira. Ekipamentu apoiu Jenerozu husi VINCI Energies liuhusi komisaun Nasionál UNICEF Fransa no Wemade Coltd liuhusi Komisaun Nasionál UNICEF korea”, Tenik Rep. UNICEF

Entretantu, parseiru xave ba Ministeiru Edukasun, UNICEF komprimitidu atu kontribui ba edukasaun ho kualidade ba labarik sira no nafatin disponivel atu servisu hamutuk ho Ministeriu.

Jornalista : Eufrozina Braz & Verónica Nunes

Editor        : Média RKDTL