Dili, 13 /12/2024-Média Defisiensia,
Prezidente Republika Demokratika Timor-Leste kondekora Medalla Méritu
prestijiozu ba Média Nasionál sanulu-resin-rua, ba sira-nia kobertura
esepsionál ba Sua Santidade Papa Francisco nia Vizita Apostólika dahuluk mai
Timor-Leste husi loron 9-11 Setembru 2024.
Prezidente no Laureadu Nobel da Pás, José
Ramos-Horta hatete, Medalla Méritu,
ne’ebé estabelese tuir Dekretu Lei No. 15/2009, rekoñese kontribuisaun sira
ne’ebé destakadu, hodi hametin orden sosiál no promove pás no estabilidade
nasionál. Mídia onrada sira hatudu profisionalizmu ezemplár iha sira-nia
kobertura komprensivu kona-ba vizita Papal, hodi fahe okaziaun importante
ida-ne’e ho mundu no dokumenta fiar kle’an povu timoroan nian.
"Kobertura klean no profisionál ne'ebé
fó hosi ami nia mídia estatál no privadu sira durante Papa Francisco nia vizita
hatudu la'ós de'it signifikadu istóriku hosi okaziaun ne'e maibé mós
kompeténsia no dedikasaun esepsionál husi jornalista sira iha ita-nia
nasaun", Prezidente Ramos-Horta hatete. "Sira nia serbisu garante
katak eventu importante ida-ne'e prezerva ba jerasaun sira iha futuru no
partilla iha nivel nasionál no internasionál", Dehan PR iha Serimónia
ne’ebé hala’o iha Palásiu Prezidensiál Nicolau Lobato, 12/12.
Prezidente Republika hatutan, iha serimónia
ne’e entrega prémiu ba manan-na’in sira husi konkursu fotografia Vizita Papal
nian, mai Timor-Leste manan-na'in sira ho orsamentu ne’ebé diferente hahu husi
prémiu dahuluk to’o prémiu dalima.
“Manan na’in sira simu prémiu mak hanesan Prémiu
Dahuluk (USD 1,250): Lirio da Fonseca, Prémiu Daruak (USD 1,150): Eugenio
Pereira da Silva Prémiu Datoluk (USD 950): Antonieta Freitas Sequeira, Prémiu
Dahaat (USD 850): Eugenio Pereira da Silva, no Prémiu Dalima (USD 750): Lirio
da Fonseca. Média Nasionál sira simu Medalla Méritu no sertifikadu
rekoñesimentu mak, Rádiu no Televizaun Timor-Leste, Empreza Públika (RTTL,
E.P.), Ajénsia Notisioza Tatoli, I.P, Grupu Mídia Nasionál (GMN), Televizaun
Edukasaun Timor (TVET), Suara Timor Lorosa’e (STL), Diário Timor Post, Jornal
Independente, Dili Post, SMNews, Hatutan.com, Fornesedór Informasaun Vídeo (VIP TV), no Lafaek
News”, Tenik PR.
Entretantu, serimónia entrega prémiu, PR inagura
espozisaun foto iha salaun Papa Francisco. Espozisaun ne’e dokumenta Sua
Santidade Papa Francisco nia Vizita Apostóliku dahuluk mai Timor-Leste inklui
fotografia vensedór sira. Espozisaun Foto ne’e sei loke ba públiku husi loron
13-20 Dezembru 2024, iha Palásiu Prezidensiál Nicolau Lobatu.
Jornalista
: Anselmo Martins
Editór : Média RKDTL
0 Comments