RHTO KONKLUI SEMINARIU HODI ASEGURA PAN NO KONVENSAUN ONU BA DIREITU EhD

 

Dili-21/11/2024-Média Defisiensia, Ra’es Hadomi Timor Oan (RHTO), konklui seminariu nasional hodi asegura inkluzaun defisiensia iha implementasaun Planu Asaun Nasional ema ho defisiensia no konvensaun ONU kona-ba direitu Ema ho Defisiensia.

Diretor RHTO Joãozito dos Santos, hatete objetivu husi atividade ne’e hodi haree no halo preparasaun ba konvensaun ONU nian, ne’ebé sei hakerek relatoriu inisial tinan rua nian relasiona ho Planu Asaun Nasiona ba EhD ba ONU.

“Timor-Leste iha tinan oin sei hakerek relatoriu inisial tinan rua nian ba ONU, ohin ne’e importante tebes atu rona ministeriu tolu nia progresu no fahe sira nia programa ne’ebé halao ba planu asaun EHD nian, ida ne’e reflete ba konvensaun direitu EHD ne’ebé adere ba.Tanba ne’e ami realiza asembleia jeral ne’e atu halo mós seminariu hodi rona ministeriu tolu nia servisu no knar sira ba implementasaun asaun nasional ba EhD bele refelete ba implementasaun kona-ba konvensaun ONU kona-ba EhD”, Dehan Diretor RHTO iha Salaun Tawer Kafe Fatuhada, 20/11.

Diretor salienta tan, IX Governu iha komitmentu, tanba buat hotu ita foin ratifika maibé iha benefísiu balun antes ona hansan subsidu no bolsa da mae ba EhD, fiar katak Ministeriu ida ne’e sei iha kompromisiu sei servisu hamutuk halo estabelesimentu konsellu ba EhD, mais komitmentu ida hanesan konvensaun ida mesmu ho tempu naruk. Inkluzaun defisiensia ne’e kesi metin direitus umanus iha artigu balun, hodi hamosu planu no politika ba ema ho defisiensia, no apresenta servisu RHTO nian ba apoiu Ema ho Defisiensia durante ne’e.

Iha fatin hanesan Representante Embaixadór Australia Felicity, afirma apresia ho papél EhD nian iha sosiedade, hodi tau matan ba maluk defisiensia sira di’ak tebes, no agradese ba governu TL nia Planu Asaun Nasional governu Australia kontinua apoiu TL.

“Ita nia papél iha sosiedade ita nia servisu no komunikasaun importante tebes ita nia servisu todan no makas, maibé ita kontinua servisu kapas tebes, ami haree imi nia servisu ami apresia ami hatene katak ita nia papél halao kapas tebes. Hau agradese ba governu Timor-Leste iha planu asaun nasional ba EhD, no governu TL nia politika di’ak, ami nafatin ajuda TL iha faze seluk ami sei iha komitmentu boot ba EhD iha TL, liuhusi atividade sira ne’e ita sei halo di’ak liutan iha futuru mai”, Salienta Felicity.

Tuir Diretor Jeral Protesaun Sosial MSSI Florencio Pina Dias Gonzaga, salienta MSSI partisipa atu fahe hanoin sira kona-ba servisu sira kona-na Planu Asaun Nasional ba EhD, no iha seminariu ne’e husi parte ministeriu tolu mak hola parte hodi divulga hanoin sira hamutuk ho EhD.

“Seminariu ne’e MSSI hola parte atu fahe hanoin liga ho implementasaun PAN tinan 2021 too 2030 iha eventu ida ohin parte MSSI sei fahe informasaun liga ho atinjimentu implementasaun PAN iha área importante sira hanesan justisa edukasaun saude no solidariedade sosial iha asistensia sosial no siguransa sosial nian, maibé MSSI sei haree liu ba rezultadu ida ligadu ho asistensia sosial, servisu sosial no seguransa sosial. Hau hanoin PAN kada fulan neen ita halo evaluasaun kada liña ministeriais sira mai apresenta sira nia rezultadu, maibé ami haree pozitivu lubuk ida ligadu ho PAN iha área justisa, saude, edukasaun inkluzivu inklui asistensia sosial di’ak tebes no kontinua hala’o hela”, Tenik Diretor.

Entretantu iha seminariu nasional no asembleia jeral RHTO nian, hamutuk ho parte relevante sira no ema ho defisiensia sira mai husi munisipiu.

Jornalista : Geraldino Magno

Editor : Média RKDTL