GRUPU AUTO EMPREGU 31 HETAN APOIU HUSI SEFOPE

Dili-14/08/2024-Média Defisiensia, Sekretariu Estadu Formasaun Profisional no Empregu (SEFOPE), nia Diresaun Nasional Empregu asina kontratu ho Grupu Auto Empregu 31 husi munisipiu 13 inklui Raeoa, hodi implementa atividade sira.

Tuir Sekretariu Estadu Rogério Araújo Mendonça hatete, durante ne’e SEFOPE fó oportunidade ba grupu auto empregu sira atu hatama proposta, hodi hetan benefísiariu husi SEFOPE ba produsaun atividade sira kada grupu iha munisipiu sira hanesan, Produsaun Batako, Negosiu, Kuda Produtu Lokal, Produsaun Sabaun no Parfum no Hakiak Ikan.

“Apoiu grupu auto empregu ne’e kada tinan SEFOPE nia Diresaun Auto Empregu, sempre fó apoiu grupu benefísiariu sira ne’ebé hetan formasaun iha sentru formasaun no balun ne’ebé hala’o ona negosiu sira presiza tulun husi governu, ohin grupu 31 mak hetan benefisiariu ne’e hodi bele ajuda sira hala’o negosiu ba sira nia aan rasik no sira bele ajuda joven sira ne’ebé dezempregu bele envolve aan iha grupu refere”, Dehan SEFOPE iha salaun Timor Load Dili, 13/08.

Sekretariu Estadu hatutan, grupu sira ne’ebé hetan benefísiariu tenke kontinua kria atividade sira labele abandona, tanba husi parte nasional no autoridade sei akompaña no kontrola grupu 31 ne’ebé hetan benefisiariu, grupu sira ne’ebé hetan apoiu sira submete proposta tuir formatu ne’ebé SEFOPE fó sai hodi hetan oportunidade ne’e.

“Proposta ne’ebé submete ba SEFOPE hodi hetan apoiu bazeia ba ida-idak nia proposta husi parte ekipa nasional ho ekipa avaliasaun sira mak halo monitorizasaun iha sira nia fatin  ne’ebé  sira presiza ba kria atividade, no sira presiza orsamentu barak ka naton parte nasional mak observa sira halo atividade boot presiza osan boot no atividade kiik entaun sira presiza osan naton no iha rezultadu ne’ebé sira simu ne’e barak liu mak orsamentu 9 mil i tal no naton  liu mak mil i tal. Grupu ne’ebé hetan benefisiariu ne’e maioria emprega joven sira ne’ebé dezempregu. Nune’e ba futuru grupu ne’ebé atu hetan benefisiariu husi orsamentu fundus transferensia públiku, sira tenke jere no uza osan ho kualidade nomos bele fó benefisiu ba grupu rasik”, Subliña Sekretariu Estadu.

Iha fatin hanesan representante benefisiariu Mafalda Cardozo da Costa husi grupu JAMILA afirma, sente kontente no agradese ba SEFOPE bele fó apoiu ba sira nia grupu, liuhusi proposta ne’ebé submete hetan nia rezultadu, ohin bele asina kontratu hodi bele kontinua hala’o sira nia atividade iha grupu ne’ebé kria ona durante ne’e.

“Hau sente kontete tebes tanba primeira ves foin tuir atividade ne’e, durante hau hala’o servisu produsaun batako maibé hau la hatene husi parte SEFOPE mós bele ajuda, maibé hau rona informasaun hau submete ami nia proposta, ohin ami bele asina ho SEFOPE. Hau sente orgullu tebes ho asina kontratu ne’e, ami nia grupu eziste kleur ona no durante ne’e, hau uza osan rasik hodi halo batako maibé ho apoiu ida ne’e bele tulu ami atu sosa tan mesin ba produsaun batako”, Tenik Benefisiariu Mafalda.

Entretantu, Grupu JEMILA produsaun batako kada mesin ida traballadór na’in tolu, liuhusi apoiu ida ne’e sira bele aumenta tan joven balu, hodi servisu iha sira nia kompaña JEMILA ba produsaun batako iha Munisípiu Covalima.

Jornalista : Geraldino Magno

Editór : Média RKDTL