Dili, 27 /07/
2024,Média, Defisiénsia, Prezidente no Laureadu Prémiu Nobel da
Páz, José. Ramos-Horta, hahu ona vizita estadu ba
Repúblika Popular Xina no Repúblika Sosialista Vietnam. Objetivu husi vizita
ida ne’e mak atu hametin relasaun bilaterál, promove kooperasaun ekonómia, no
haforsa parserias rejionál sira.
Vizita estadu Prezidente Ramos-Horta
nian ba Xina sei hahú iha loron 29 to'o 31 Jullu. Vizita ne'e sei hahú ho
serimónia benvindu ofisiál no serimónia tau koroa. Prezidente Ramos-Horta sei
partisipa iha série sorumutu nivel as ho lider xave Xina nian sira, inklui
Prezidente Xi Jinping, Primeiru-Ministru Li Qiang, no Prezidente Kongresu Nasionál
Populár, Zhao Leji.
Eventu xave sira iha vizita Prezidente
Ramos-Horta nian ba Xina sei inklui enkontru bilateral ho Prezidente Xi
Jinping. Akordu importante balun inklui Planu Kooperasaun entre Governu Xina no
Timor-Leste kona-ba Inisiativa Belt and Road (BRI), Akordu Servisu Aéreu, no
kooperasaun iha área agrikultura no média sei asina. Prezidente sei mós
partisipa iha jantar estadu ne'ebé organiza husi Prezidente Xi Jinping. Durante
vizita estadu ne'e, Prezidente sei hato’o diskursu importante iha Fórum Negósiu
kona-ba "Oportunidade Investimentu Timor-Leste nian," aprezenta
perspetiva investimentu ba investidór potensiál sira husi Xina no kria
oportunidade networking ba empreza sira husi nasaun rua ne'e.
Iha loron 31 fulan-Jullu, Prezidente
sei desloka ba Vietnam ba vizita estadu husi loron 1 to'o 4 Agostu. Iha
Vietnam, Prezidente Ramos-Horta sei simu ho serimónia ofisiál. Enkontru nivel
as sira planeadu ona ho Sekretáriu-Jerál Partidu Komunista no Prezidente
Vietnam, To Lam, Primeiru-Ministru Pham Minh Chinh, no Ministru Negósiu
Estranjeiru Bui Thanh Son. Diskusaun hirak ne'e ho objetivu atu hametin
ligasaun diplomátika no esplora área kooperasaun hamutuk. Prezidente mós iha
ajenda atu sai sasin ba asinatura akordu bilateral sira, ne'ebé subliña
kompromisu atu hametin relasaun entre nasaun rua ne'e.
Prezidente Ramos-Horta deklara,
"Vizita ida ne'e reprezenta pasu signifikativu ba Timor-Leste iha
promosaun ligasaun besik liu ho Xina no Vietnam no promosaun ita nia interese
komún iha rejiaun. Ami hein atu hakle’an ami nia parserias no esplora dalan
foun ba kooperasaun ne'ebé sei fó benefísiu ba ita nia nasaun sira no kontribui
ba estabilidade no prosperidade rejionál."
Bainhira Timor-Leste kontinua hari
ninia relasaun internasionál, vizita estadu ida ne'e marka etapa importante ida
iha esforsu diplomátiku nasaun nian no nia buka ba kooperasaun ekonómia no
polítika ne’ebé bo’ot liu iha Ázia.
Jornalista : Anselmo Martins
Editor : Média RKDTL
0 Comments