PM ABERTURA DIALOGU AL SAI KAMPIAUN BA IGUALDADE JENERU IHA SUKU

 

Dili-22/07/2024-Media Defisiensia, Primeiru Ministru abertura Forum Dialogu kona-ba Autoridade Lokal  sai Kampiaun ba Igualdade Jeneru, husu sefe suku sira atu tau atensaun ba violensia kontra jeneru.

Tuir Primeiru Ministru Kay-Rala Xanana Gusmão hatete, misaun no objetivu SEI atu empodera feto iha prosesu dezenvolvimentu no husu autoridade lokal sira, atu tau atensaun ba violensia bazeia ba jeneru no enkoraja joven no komunidade sira hodi redus problema ne’e.

“Ita iha misaun no objetivu boot ida  empodera feto iha prosesu hodi lori rai ne’e ba oin, ita hakarak asuntu ne’ebé importante ba hau, hodi kolia ba imi kona-ba igualdade no planu sira SEI nafatin hala’o no husu ba PAM to’o ba sefe Suku sira tau atensaun boot liu ba violensia kontra jeneru ida ne’e sai problema boot, tanba ne’e husu atu ekoraja joven no komunidade sira hodi menus ona hatudu asaun moral sira”, Dehan PM iha Salaun OKA Surik-Mas,18/07.

Hatutan PM violensia kontra feto husu sefe suku sira, atu konsensializa uluk feto sira no haree problema sosiais sira akontese iha komunidade nia leet, hodi resolve liuliu problema violensia kontra jeneru.

“Ita kuandu kolia kona-ba violensia kontra feto dala ruma asaun ida hola malu ne’e violensia iha liur ho ida ne’e mak husu atu konsensializa uluk feto sira husu ba sefe suku sira atu halao servisu diak. Violensia domestika la’os agora akontese kleur ona husu sefe suku sira atu haree problema sosiais sira no komunidade nia moris bolu komunidade sira, hodi rezolve sira nia problema ida ne’e mak sai kampeaun ba komunidade bainhira imi defende didiak feto, mane no joven sira hanorin sira sai didiak”, Afirma PM  

Iha fatin hanesan Sekretaria Estadu Igualdade Elvina Sousa Carvalho dehan, objetivu husi forum dialogu ohin kona-ba Autoridade Lokal sira sai kampeaun ba igualdade jeneru iha suku, tanba ho atividade sira hodi harahun bareira sira ne’ebé teri netik feto sira atu hetan oportunidade iha atividade hotu.

“Ita boot sira hanesan “kampiaun ba igualdade jéneru”.  Ema ne’ebé sai kampiaun ba igualdade jéneru sei dedika-an atu inisia atividade sira hodi harahun bareira ne’ebe terik-netik feto sira nia oportunidade, dezafia esteréotipu jéneru sira no kria inisitivu ba hasae partisipasaun feto iha polítika no hakbiit ekonomia feto rural sira. Forum dialogu ida ne’e mós atu rekoñese kontribuisaun ita boot sira nian iha hari pás iha komunidade laran.  Kna’ar importante ne’ebé ita boot sira iha, hatu’ur ona iha Lei Suku nu. 9/2016 iha Art. 23 konaba kompetensia xefe suku nian atu kria mekanizmu prevensaun violénsia domestika no kria inisitivu sira ba protesaun no akompaña vítima sira kria mekanizmu atu halo prevensaun, maneija no resolve konflitu sira”, Salienta SEI.

Forum dialogu ne’e sei haforsa liu tan ita nia kolaborasaun servisu iha baze, no kontribui ba transforma mudansa igualdade jéneru iha komunidade, tanba ne’e autoridade lokal sira mak sai kampeaun ba promove no prevene igualdade jeneru iha Timor-Leste ba futuru.

“Hahu agora ita boot sira mak kampiaun ba promove igualdade jéneru, prevene violénsia bazeia ba jéneru no diskriminasaun hasoru feto sira, hasae kbiit ekonomia feto no kbiit lideransa feto, ema ho defisiensia, no grupu vulneravel sira seluk atu partisipa iha dezenvolvimentu suku. Ita boot sira mak sai kampiaun ba lian-laek sira, kampiaun ba kbiit- laek sira, atu sira bele iha kbiit fali, no sira nia lian ema bele rona, hamutuk halo mudansa ba igualdade jéneru iha suku”.

Representante Autoridade Lokal Bernarda Soares Gomes hanesan xefe Suku Aiteas Munisipiu Manatutu salient, forum dialogu nia sente di’ak bele rona informasaun sira kona-ba violensia bazeia ba jeneru no feto sira nia partisipasaun iha atividade sira, nune’e ba futuru hanesan sefe suku nafatin enkoraja maluk feto sira hodi partisia iha atividade politika.

“Liuhusi dialogu ohin ami hetan informasaun oinsa atu lidera ka kompete dalabarak ita hanesan feto ema balun sei impede hela, tanba kultura husi informasaun sira ne’e maka loke ita nia lideransa feto atu partisipa kualker atividade ruma tanba feto barak mak sedauk hatene kona-ba lideransa no laiha kbiit atu partisipa menus, hau hanesan lideransa lokal ida sente orgullu tebes, liuhusi informasaun ne’e hau bele habelar tan informasaun kona-ba partisipasaun feto iha tinan hitu mai”, Tenik Xefe suku Aiteas, Manatutu.

Entretantu husu ba SEI nafatin hala’o atividade sira labele iha nasional tenke ba too Postu no suku sira, tanba feto barak mak menus partisipasaun iha politika no atividade sira seluk, nune’e autroridade lokal sira bele haklean liutan informasaun ba komunidade sira, liuhusi dialogu ne’e ba oin sira nafatin  fahe informasaun ba maluk feto sira no ema ho defisiensia sira hodi hatene kona-ba partisiapasaun sira nia iha atividade hotu.

Jornalista : Geraldino Magno

Editor: Média RKDTL