Dili-28/05/2024-Media Defisiénsia, Prezidente Republika Demokrátika Timor-Leste, simu kredensiál husi Embaixadór foun sira ne'ebé foin nomeadu husi Repúblika Argentina, Repúblika Xile no Repúblika Ghana no Embaixadór foun Estraordináriu ba Timor-Leste.
Prezidente José Ramos-Horta hatete, simu Embaixadór foun hodi reforsa kompromisu Timor-Leste atu hametin relasaun amizade no kooperasaun bilaterál entre nasaun tolu.
“Simu Embaixadór foun sira no reforsa kompromisu Timor-Leste nian atu hametin relasaun amizade no kooperasaun bilaterál ho Argentina, Xile no Ghana hodi fó benefísiu mútua ba povu tomak, liuliu relasaun Timor-Leste nian ho Argentina husi estabelesimentu relasaun diplomátika iha 2002 no kontinua simu kooperasaun liuhusi akordu kooperasaun téknika 2013 ne'ebé fasilita interkámbiu no projetu konjunta sira”, Dehan Prezidente liuhusi Komunikadu Imprensa iha Palasiu, 28/05.
Prezidente hatutan fó apresiasaun ba Republika Xile nia apoiu durante luta ba independensia no kandidatu Timor-Leste nian iha Nasoins Unidas, ho embaixadór foun ne’e ita nia relasaun sei metin nafatin no enkoraja Republika Ghana atu estabelese rezidénsia iha Dili, hodi fasilita kooperasaun ne’ebé besik no diak liu iha futuru.
“Prezidente Repúblika nota relasaun istórika nasaun rua durante luta ba independénsia Timor-Leste nian. Prezidente hato'o nia apresiasaun ba apoiu husi Xile ba kandidatura Timor-Leste nian, iha Nasoins Unidas no hein katak relasaun ho Embaixadór foun ne'e sei di’ak liu no Timor-Leste hakarak atu hametin relasaun amizade ne'ebé hahú iha 2002. Enkoraja Ghana atu estabelese rezidénsia misaun diplomátika ida iha Dili, hodi fasilita kooperasaun ne'ebé besik no liuhusi forum multilaterál hanesan g7+ no CPLP”, Tenik Presidente Republika.
Entretantu, Prezidente Repúblika kongratula Embaixadór foun na'in tolu no hein atu servisu hamutuk hodi promove ajenda bilaterál, reforsa ligasaun amizade no esplora parseria ne'ebé bele fó benefisia ba malu husi setór oin-oin iha futuru.
Jornalista : Anselmo Martins
Média : RKDTL
0 Comments