MEMBRU PCIC IDA HUSU OSAN BA FAMILIA ARNOLFO HORTA EZIJE, DESIZAUN TODAN

 

Dili-23/05/2024- Media defisiensia, Prezidente Repúblika José Ramos Horta husu ba justisa atu halo investigasaun klea'an no foti desizaun todan hasoru membru Polisia Sientifiku Investigasaun Kriminál (PCIC) ne'ebé tenta husu osan ho montante $2,000 ba fuzitivu Arnolfo Teves Jr nia oan mane iha fulan kontuk.

"Iha fulan kotuk ita haree no rona iha media sosial elementu PCIC ida husu osan ba Fuzitivu ne'e nia oan mane, ha'u espera prosesu investigasaun kona-ba 'buatamak' ne'e kompleta ona, halo ita nia naran aat, halo PCIC nia naran aat, tenke foti desizaun seriu ba nia, tanba hamonu ita nia nasaun ba iha tahu laran," Prezidente Horta hatete ba jornalista sira iha Palásiu Prezidensiál Bairro-Pite 22/05.

Ema númeru ida iha Timor-Leste ne'e hatutan, Timor-Leste iha prosesu adezaun ba membru permanente ASEAN iha tinan oin presiza kooperasaun iha setór hotu, inkluindu kooperassun Polisia, kooperasaun kona-ba anti terorizmu, money laundry maibé elementu ida PCIC prátika hahalok hamonu Timor-Leste nia naran.

"Ha'u hein de'it prosesu investigasaun. Dala barak investigasaun ba buat sira hanesan ne'e ita nunka rona rezultadu, ha'u nafatin ezije rezultadu investigasaun, ha'u lakoi hein kleur tan, tanba ema kiik sira baibain halo sala ka'er kedan lori ba kastigu, nusa ida hamonu ita nia nasaun nia naran, halo violasaun grave la ba kastigu, hau nafatin ezije," tenik Xefe Estadu.

Rekorda fali katak iha loron 09 fulan-abríl 2024 PCIC suspende ona membru hosi nia servisu tanba suspeita husu osan ba rekluzu filipinu, Arnolfo Jr nian ona mane.

PCIC halo ona suspensaun ba nia servisu no halo ona averiguasaun ba membru PCIC ne'ebé mak husu osan ba oan hosi sidadaun estranjeiru Filipino iha prizaun.

Averiguasaun ne'e hahú, atu rekolla faktu no prova sira no mós indísiu sira inklui medida saida mak atu foti ba membru ne'e.

Nune'e prosesu internu ba membru ne'e la'o, prosesu averiguasaun ne'e tuir dokumentu ne'ebé mak asesu iha prazu loron 10 atu konklui averiguasaun hasoru membru ne'e.

Entretantu, membru PCIC suspende ona hosi nia funsaun ho objetivu atu submete ba prosesu averiguasaun ne'ebé la'o hela hasoru nia.

Prosesu sira ne'e la'o mak iha indísiu no iha komitmentu krime ruma ne'ebe mak membru ne'e komete tenke partisipa ba Ministériu Públiku para nia bá hatan tuir lei.

Ho nune'e Tavares nu'udar oan husi fuzitivu alerta katak aktu hosi membru PCIC individu no la'ós nu'udar aktu instituisaun PCIC. Ema idaidak iha ninian responsabilidade ba aktu pesoál ne'ebé mak nia iha, aktu ne'ebé membru PCIC halo ne'e nu'udar aktu pesoál ou  bolu kasar oknum mak halo sasán ida-ne'e.

Nune' públiku sira haree análize klea'an gravasaun ninian hateten katak ne'e oknum mak halo, nune'e prosesu judisiál hein hasoru nia, prosesu disipliñar hein hasoru nia no nia ba hatan ba asaun ne'ebé nia halo.

Aktu ne'ebé membru PCIC halo la iha koñesimentu hosi PCIC, tanba laiha ema iha ona prizaun tenke fó osan atu garante seguransa ba prizioneiru durante iha prizaun laran.

PCIC halo de'it nia servisu tuir lei haruka, PCIC halo detensaun ba fuzitivu Filipino durante oras 48 hodi submete ba primeiru audisaun iha Supremu Tribunál Justisa. Bain hira desizaun Tribunál iha hafoin lori fuzitivu ne'e ba kumpre Prizaun Preventiva.

Rekorda fali katak sidadaun Filipinu ho naran Arnolfo Teves JR molok ne'e, iha kinta 22 fulan- marsu 2024 mak autoridade PCIC halo detensaun internasionál bain hira sidadaun ne'e halimar hela Golf iha area Metiaut Cristo Rei nian.

Autoridade PCIC detein sidadaun Filipinu ne'etanba autór intetuál ba krime asasinatu iha Filipina hodi oho Governadór ida iha Filipina. No sidadaun ne'e sai fuzitivu no autoridade PCIC kaer iha Dili.

Enkuantu antes ne'e Deskonfia, ema ida ho lian atu hanesan pesoál membru PCIC husu osan $2,000 bá fujitivu  Arnolfo “Arnie” Alipin Teves Jr nia oan-mane  atu bele fó seguransa másima bá Teves Jr ne’ebé oras ne’e kumpre hela prizaun preventiva iha Prizaun Becora, Dili.

Jornalista: Angelmo J.M da C.Martins

Editor       :  RKDTL