ADTL HO CDITL REALIZA SELEBRASAUN LORON DEFISIENSIA NO HALO SENSIBILIZASAUN BA EHD IHA ATAURO

 

Dili-11/12/2023-Média Defisiensia, Asosiasaun Defisiensia Timor-Leste ho Centro Dezenvolvimentu Inkluzivu Timor-Leste realiza atividade selebrasaun loron defisiensia no halo sosializasaun informasaun kona-ba direitu ema ho defisiensia iha Atauro.

Diretór Ezekutivu Asosiasaun Defisiensia Timor-Leste Cezário da Silva hatete ambitu selebrasaun Ehd nian servisu hamutuk ho komunidade sira hodi hala’o sensibilizasaun kona-ba direitu ema ho defisiensia, tanba ne’e atividade esensiál husi selebrasaun atu konsensializa ema hotu kona-ba direitu no rona difikuldade  husi ema ho defisiensia.  

“Iha ambitu selebrasaun loron ema ho defisiensia nian ita hamutuk ho komunidade sira hala’o atividade sensibilizasaun kona-ba direitu ema ho defisiensia nian, tanba ne’e atividade esensiál husi selebrasaun atu konsensializa ema hotu kona-ba direitu, saúde, asuntu sosial ema ho defiesiensia no oinsa bele rona sira ninia difikuldade iha sira nia moris iha komunidade nia leet”, dehan Diretór Cezario.

Diretór Salienta fundus ba atividade selebrasaun ne’e Asosiasaun Defisiensia Timor-Leste hetan ajuda husi Oxfam, USAID no PHD, fundos ne’e designadu ba sensibilizasaun iha nivel munisipiu sira hodi tau prioridade ba Ehd nia asesu ba servisu hotu ne’ebé sira bele no rona maluk defisiensia sira nia preokupasaun hafoin halo sensibilzasaun nune’e sira bele hato’o ba parte relevante sira.

“Atividade selebrasaun ne’e hetan ajuda husi Oxfam, USAID no PHD, fundos ne’e designadu ba sensibilizasaun iha nivel munisipiu sira no tau prioridade ba Ehd nia asesu ba subsídiu no edukasaun, tanba ne’e baseia ba komunidade nia preokupasaun sira hafoin halo sensibilzasaun no sira sei hato’o ba Ministériu  Edukasaun no MSSI, ho razaun sira balun ne’ebé komunidade hato’o katak sira simu ona subsidiu maibé tempu tuir fali sira la simu subsidiu inklui labarik sira ho defisiensia ne’ebé idade 17 anos mai kraik sira sedauk simu subsídiu, nune’e governu sira bele haree kona-ba problema hirak ne’e hodi foti desizaun baseia ba dekretu lei”, Tenik Cezario.

Iha fatin hanen partisipante Evangelina Morato nu’udar defisiensia fiziku dehan sente kontente tebes tanba foin akontesi iha sira nia suku no sira iha oportunidade bele tuir selebrasaun loron nasional ba Ehd no hetan informasaun foun husi maluk defisiensia sira.

“Hau sente konte tanba sei iha oportunidade no primeira ves foin akontese iha ami nia suku hodi selebra loron defisiensia hamutuk ho ami defisiensia no komunidade sira”

Entretantu sira sujere ba futuru sira hakarak loron defisiensia ne’e labele akontese ka selebra de’it iha Dili tenke halo ba munisipiu sira inklui Atauro nune’e maluk defisiensia sira bele partisipa hotu hodi bele sente kontente ho loron espesiál ba Ehd.

Jornalista: Eufrosina no Geraldino

EDITOR: Média RKDTL