EHD LABELE EZERSE DIREITU HO DIAK TANBA SENTRU VOTASAUN IHA ESKOLA ANDAR

 

Baucau-28/10/2023-Media Defisiensia, Ema ho Defisiensia labele ezerse direitu iha Elisaun Lideransa Komunitaria ho diak tanba fatin refere laiha asesibilidade ba EdD sira nune’e mos Sentru Votasaun iha Eskola Andar Santo Domingos Savio Munisipiu Baucau.

Iha intervista ba Media RKDTL Rado Ximenes Pinto hanesan Defisiensia Fisiku hateten fatin Elisaun la asesu ba EhD sira iha Elisaun Lideransa Komunitaria tanba Sentru Votasaun iha Eskola Andar, nune’e mos Elisaun  lala’o tuir liña no sira dudu malu iha sentru Votasaun, hodi lafo uluk Oportunidade ba EhD no vuneravel sira.

“Tuir ha’u nia observasaun ba Elisaun Lideransa Komunitaria iha tinan 2023 nian ne’e, fatin Elisaun la asesu ba Ema ho Defisiensia tanba sentru votasaun sira halo iha Andar Leten no laiha asesibilidade ba Ema ho Defisiensia sira no mos Ema ho Defisiensia sira ne’ebe mak mai vota ne’e hotu tenki tuir liña lafo oportunidade ba Ema ho Defisiensia, katuas, ferik no feto ne’ebe ho Isin rua sira, no mos iha ne’eba ami nia observa sira la tau liña no ema hotu-hotu ba vota ne’e dudu malu barak lahalimar liu husi ami nia Aldeia ne’ebe tuir ha’u Observa Ema ho Defisiensia katuas ferik dudu malu depois tama ba iha fatin Elisaun nian mak sira ba vota” Dehan Rado Ximenes Pinto iha Munisipiu Baucau, Postu Administrativu, Baucau Vila, Suku Bahu, Aldeia Ana-Ulo.

Nia hatutan husu ba Ministeriu Administrativu Estatal wainhira implementa Elisaun presiza identifika uluk fatin nune’e labele fo impaktu ba EhD sira iha Sentru votasaun, no mos presiza halo mudansa ba Staff sira ne’ebe halo atendementu ba Elisaun uza manual deit, maibe ba futuru presiza hadia sistema diak liu tan atu ema hotu-hotu bele ezerse votu ho lalais.

“Ha’u nia rekomendasaun ba Ministeriu Administrativu Estatal wainhira atu implementa Elisaun Lideransa Komunitaria tuir fila fali mai primeriu identifika uluk fatin ne’ebe bele asesibel ba ema hotu-hotu atu asesu iha Sentru Votasaun. Segundu sira tenki tau liña atu nune’e ema hotu-hotu bele ba vota. Terseriu sira tenki halo mudansa ba iha staff hotu-hotu liu-liu staff sira ne’ebe toma konta ba elisaun nian ne’e sira uza manual deit, tuir fila fali mai bele halo Sistema ida ne’ebe diak liu tan atu ema hotu-hotu bele vota ho lalais. Iha kuatru sira tenki fo oportunidade ba Ema ho Defisiensia no Ema ne’ebe ho Vuneravel inklui feto ne’ebe ho isin rua nune’e sira bele ba vota uluk ida ne’e mak importante” Tenik nia  

Entretantu Ema ho Defisiensia ne’ebe ezerse sira nia votu iha Elisaun Lideransa hamutuk nain sanulu ho Tipu Defisiensia Fisiku, Matan no Intelektual inklui Defisiensia balu atu vota tan maibe kalan ona sira labele vota, no Elisaun Suku sei hakat fali ba Segundu Ronde iha loron 13 Fulan Novembro tinan 2023.

Jornalista: Ermenciana Alves

Media: RKDTL