KDT-TL SELEBRA LORON INTERNASIONAL BA LIAN JESTUAL IHA TL

 

Diretora KDT-TL Crecência Madeira de Deus 

Dili 23/09/2023-Media Defisiensia, Organizasaun Klibur Defisiensia Tilun-Timor-Leste Selebra Aniversariu loron Internasional ba sinal Jestual iha Munisipiu Ermera Postu-Administrativu Railaku hodi halo Sosializasaun lian jestual ba komunidade sira.

Tuir Diretóra Klibur Defisiensia Tilun Timor-Leste (KDT-TL), Crecência Madeira de Deus hatete, Asembleia jerál Nasoens Unidas deside iha loron 23 fulan Setembru nu’udar loron mundial ba lian jestual, hodi valoriza maluk defisiensia tilun sira iha mundu.

“Ami sente konteti tamba selebra ona loron lian jestual Nasional, no parabens ba Komunidade Defisiénsia Tilun iha Mundu no mos inklui Timor-Leste, Ohin loron KDT-TL selebra loron dahuluk ba lian jestual iha mundu ida ne’e, loron 23 fulan setembru ami hamutuk ho difisiensia sira hakarak selebra loron mundial lian jestual iha Munisipiu Ermera Aldeia Palimanu no hakarak hamutuk ho ema ho defisiensia inklui mos membru governu sira” Dehan Crecência Madeira de Deus iha fatin Selebrasaun Railaku.

Diretóra ne’e hatutan, mensajem ba  familia ne’ebe mak iha oan ho difisiensia tilun labele baruk lori sira mai aprende lian jestual tamba lian jestual impotante ba sira no ami bele halo komunikasaun ba malu no asesu ba informasaun sira.

Vice-Ministra Solidariedade Sosiál no Inkluzaun (MSSI), Céu Brites

Iha fatin hanesan Vice-Ministra Solidariedade Sosiál no Inkluzaun (MSSI), Céu Brites, hato’o parabens ba Ema ho Defisiensia Tilun Timor-Leste ho lian jestual, iha komemorasaun loron internasionál ne’ebé selebra hamutuk ho komunidade sira iha postu-Adminstrativu Railaku suku Fatuquero sabadu semana kotuk.

 “Hau senti Orgullu tebes hodi marka prezensa iha loron  Internasional Lian Jestual sai loron importante ida ne’ebé  ita labele selebra deit ohin,  maibe tinan oin mai ita tenki selebra  iha Munisipu hotu-hotu no halo eventu ne’ebé  bo’ot  hodi ema bele hatene katak iha ita nia komunidade ne’e iha ema ho défisiensia tilun maibé sira aprende ona ho lian jestual”. Katak Céu Brites.

Ministra ne’e Salienta, konstituisaun hakerek ona direitu ba ema ho defisiensia iha Timor-Leste katak ema hotu-hotu iha direitu ne’ebé hanesan hodi respeita malu hodi la sukat kondisaun sira ne’ebé iha.

Autoridade Lokal Postu-Administrativu Railaku  Feliz Barros da Silva

Nune’e mós Autoridade Lokal Postu-Administrativu Railaku Suku Fatuquero Aldeia Palimanu Feliz Barros da Silva  hatete, apresia ho Programa KDT-TL hodi selebra loron internasional lian jestual hamutuk ho komunidade sira iha fatin refere.

“Durante ne’e seidauk iha programa ruma husi ema ho Defisiensia mai selebra iha ami nia suku, tamba ne’e husi programa KDT-TL bele fo sai informasaun sira ba komunidade kona-ba lian jestual nian nune’e bele hatudu dalan ba sira ne’ebé seidauk hola parte iha programa ka Organizasaun sira ne’e” Katak Autoridade Lokal Suku FatuQuero.

Autoridade Lokal Suku Fatuquero rekomenda ba Asosiasaun Difisiensia (KDT-TL), nomos   organizasaun sira seluk atu nafatin servisu hamutuk ho autoridade lokal sira hodi bele hetan dadus ne’ebe diak no hato’o ba governu no governu bele halo medidas ou buka dalan hodi apoiu ita nia maluk difisiensia sira ne’ebé hela iha area rural.

Entretantu Selebrasaun loron internasionál Lian Jestual ba Emah o Defisiensia Tilun Timor-Leste realiza iha Aldeia Palimanu, Suku Fatoquero, Posto-Adminstrativu Railaco Munisipiu Ermera, Marka Prezensa husi Vice Ministra (MSSI), Secretaria Estado Igualdae Inklusaun (SEI), Adjuntu (PDHJ), Diretor Executivo (ADTL), Presidente Autoridade Munisipiu Ermera, Chefe Aldeia Palimanu, Eskola Kafe Ermera, Staff RHTO, komunidade no ema defisiensia no la defisiensia. Atividade refere hetan fundus husi Asosiasaun ADTL ho montante $ 500

Jornalista: Eufrosina S. Brás, Geraldino P. Magno ho Efifania dos Santos

Editor: Alexandre Salsinha