Dili-01/08/2023 Media
Defisiénsia- Asosiasaun Halibur Defisiénsia Matan Timor-Leste (AHDMTL)
fasilita Formasaun não formal ba ema ho defisiénsia matan kona-ba letra brille
hodi fasilita sira bele lee no hakerek.
Iha intervista ba
jornalista RKDTL formador Luis Faria hatete, wainhira hahu fasilita formasaun
letra brille sira hahu ho abjek depois tama ba modul no sira mos hare maluk
defisiensia matan sira ne’ebé moris mai defisiénsia kedas no balun moris mai
diak ikus foin hetan defisiénsia nune’e bele fó formasaun materia ba sira.
“Nia salienta liu tan letra brille ne’e la
fasil atu komprende maibé sei liu husi prosesu naruk nia laran, foin komprende.
Atividade fó formasaun ida ne’e atu kapasita maluk defisiensia matan sira atu
bele hatene letra brille ho di’ak no presiza aprende brille husi edukasaun não
formal nune’e bele hola parte iha edukasaun formal nian”.
Formador ne’e
rekomenda ba estudante ne’ebé aprende no komprende ona letra brille AHDMTL sei
lori ba kontinua eskola iha ensinu rekorente tamba ne’e nafatin iha vontade
hodi aprende iha formasaun nia laran.
Iha fatin hanesan
estudante husi formasaun refere Delinha Ticia da Costa hatete, wainhira aprende
letra brille ne’e senti defisil oitoan, maibé nafatin aprende too agora bele
ona lee no hakerek nomos asesu iha edukasaun formal.
“Formasaun husi
materia sira ne’ebé ami aprende iha oin haat aprende primeiru koñese uluk letra
brille nia funsaun no mos formula husi letra brille. Bainhira ami hatene ona
funsaun sira maka ami bele uza ona modul atu nune’e ami rasik hakerek nune’e
ami bele koñese lala’ok hakerek uza letra brille nian”. Dehan estudante iha
sala formasaun AHDMTL.
Delina husu ba parte
relevante sira hotu ne’ebé servisu no tau matan ba asuntu ema ho defisiensia
nian atu nafatin apoiu sira ne’ebé ho kondisaun defisiensia matan sira liu husi
fo forrmasaun ba letra brille no ekipamentus sira hanesan tonka tatu ajuda sira
hala’o viajem iha dalan públiku.
Entretantu
estudante husi formasaun refere kompostu husi mane 40 no feto 45 formasaun
ne’ebé hala’o formasaun durante fulan tolu no fasilita husi Asosiasaun AHDMTL.
Jornalista:
Pascoal Nascimento de Jesus & Geraldino Magno
Editor: Alexandre Salsinha
0 Comments