CNC HO ACBIT ASINA NOTA ENTENDIMENTU HODI SERVISU HAMUTUK

 

Dili-01/08/2023-Media Defisiensia, Centro Nsaional Chega (CNC) asina nota entendimentu ho Assosiasaun Chega Ba Ita (ACBIT) hodi servisu hamutuk fo apoiu ba maluk sobreviventes sira iha Timor-Leste.

Tuir Diretur CNC Hugo maria Fernandes hatete, husi parte rua ne’e sei servisu hamutuk hodi bele fo apoiu ba maluk sobreviventes sira.

“Husi parte rua ne’e bele apoiu malu iha implementasaun atividade sira ne’ebé mak relasiona no fo apoiu ba sobreviventes sira parseria ida ne’e hosi bele apoiu, Centro Chega iha prosesu elaborasaun sira programa atividade sira ne’ebé mak mai ho aprosimasaun bazeia ba vitima sira nia nesesidade,” dehan Diretur CNC Hugo maria Fernandes.

Diretur ne’e klarifika tan, apoiu ne’ebé sira hala’o mak tratamentu saúde no fo apoiu finanseiru ba sira hodi bele dezenvolve sira nia an rasik.

“Ami hanoin hela iha medidas hirak kedan liu-liu ba apoiu tratamentu saúde ba sobreviventes sira, no fo apoiu finanseiru atividade ekonomia ne’ebé mak sobreviventes sira bele halo, para depois sira bele sobre vive duni, labele dependensia ba familia no nasaun, maibé husi inisiativa ida ne’e sira bele iha abilidade rasik atu bele dezenvolve sira nia an rasik, iha fulan ida ne’e CNC ho Hakbit sei tur fali hodi hare prioridade saida mak atu halo,” hakotu nia.

Fatin hanesan Diretora Organizasaun Hakbit Manuela Monteiro hatete, servisu hamutuk ne’ebé sira hala’o maske neneik maibé sai forte liu.

“Ami servisu hamutuk durante ida ne’e hanesan pasu ida ne’ebé ke la’o neneik maibé ita hare katak sai forte liu tan, tanba ne’e mos hanesan konfiansa ida ne’ebé fo ba ami hanesan organizasaun naun governamental atu bele sai parseiru ne’ebé ke servisu mos ba apoiu ida ne’e tanba barak mak hela dok tebes presiza ajuda husi organizasaun ou ema ruma ne’ebé bele sai ponte ba sira,” informa Diretora Organizasaun Hakbit Manuela Monteiro.

Nia hatutan, servisu ne’ebé durante ne’e hamutuk ho CNC halo ona mak apoiu uma no mos bolsa estudu ba sobreviventes sira nia oan.

“Servisu hamutuk ne’ebé durante ne’e ita halo liu husi apoiu ne’ebé ami hetan husi CNC apoiu ituan ituan hodi apoiu ba uma no apoiu ba negosiu hodi nune’e mos halo bolsa de estudu ba vitima sobrevivente sira nia oan, ida ne’e mos ajuda liu tan oinsa atu sira bele asesu ba programa ne’ebé durante ne’e sira seidauk hetan,”hakotu nia.

Enkuantu liu husi servisu sira ne’ebé CNC no ACBIT halo bele hakmaan ona sobreviventes sira nia problema ne’ebé durante ne’e sira hasoru.

Jornalista: Pascoal Nascimento de Jesus

Editor: Alexandre Salsinha