KOMUNIDADE ALDEIA UAIBOBO NAFATIN HALERIK BA KONDISAUN ESTRADA NO BEE MOS

 

Baucau- 20/10/2025- Média Defisiensia, Komunidade Aldeia Uaibobo suku Bado-Ho’o Postu Administrativu Venilale Munispsiu Baucau preokupa ho kondisaun Estrada ne’ebé aat, difikulta tebes sira nia movimentu loro-loron nia, liu-liu iha tempu udan. Estrada ne’e sai hanesan obstákulu boot id aba komunidade refere hodi lori sira nia produtu ba faan iha merkadu.

 

Iha intervista reprejenta Komunidade Aldeia Uaibobo Manuel Soares Guteres hatete, problema barak mak durante ne’e hasoru maibé seidauk iha solusaun husi parte relevante sira, nia husu ba governu atu bele rejolve ba preokupasaun sira ne’e.

 

“ atualmente agora  iha area rurais liu-liu iha area ami ninian ida ne’e, Aldeia Uaibobo Suku Bado-Ho’o Postu Venilalae ninian hasoru problema lubun ida ne’ebé ami halerik, maske ita nia dezenvolvimentu lao’o dadaun, maibé espesialmente iha area ida ne’e komunidade hasoru problema uluk liu mak Estrada ba sira ne’ebé mak ho kondisaun ne’ebé la favoravel, tuir mai be’e mos ne’ebé difisil tebes tanba hori uluk kedas iha subskrisaun komunidade ninian dada bee mos ba fatin ida ne’e, ba rai ida ne’e, iha tempu Indonesia ami hanesan komunidade husu ajuda ba grupus kompañia balu ne’ebé mai hadia bee, maibé ohin loron povu sei halerik nafatin, liu-liu hanesan atan ha’u rasik iha fatin ida ne’e ami rasik senti hela kona bee mos,” dehan Manuel ba Média RKDTL 15/10. Semana ne’e.

 

Nia hatutan, relasiona ho Problema hirak ne’ebé sira enfrenta durante ne’e, mak sei kopera ho autoridade lokál sira atu buka dalan ba rejolve problema hirak n e’e, no preokupasaun hirak ne’e mos durante ne’e iha  parte balu survei ona maibé seidauk iha resposta to’o ohin loron.

“Estrada ne’e hanesan bailoron kareta ho motor bele liu, maibé kuandu udan monu rai ne’e susar tebes atu liu, maibé iha tempu emerjensia balu pasensia obrigatoriu maske hasoru difikuldade barak tanba Estrada la di’ak, maske iha programa Nasionál dezenvolvimentu suku ka (PNDS) ne’e apoiu hela, maibé iha sei inkompletu hela, tanba ne’e ami sei hato’o proposta ruma liu husi xefe aldeia xefe suku to’o administrasaun hodi bele hetan apoiu ruma husi governu para bele haida atu nune’e komunidade sir abele asesu liu-liu iha emerjensia rum aba saúde ninian presija duni kareta. No bele fasilita mos ita nia komunidade sira bele asesu ba merkadu,” hakotu nia.

 

Fatin hanesan Xefe Aldeia Uaibobo Oscar Vitorino salienta, relasiona ho problema hirak ne’ebé durante sira hasoru, parte autoridade lokál hato’o ona ba iha parte relevante maibé seidauk iha resposta ida ne’ebé pozetivu, maske nune’e durante ne’e sira susar ba bee mos, maibé liu husi kontribuisaun komunidade sira nian maka tau orsamentu hodi kanaliza bee mos ba komunidade sira iha aldeia refere.

 

“kona ba problema sira hanesan Estrada be’e no seluk tan ne’ebé komunidade sira preokupa ami autoridade pronto par kopera la’o ho komunidade par servisu, kona ba Estrada ninian husi autoridade hatama proposta ba maibé to’o iha ne’ebá la iha resposta, tuir fali kada aldeia ne’e mak ami hetan kona ba PNDS nian ne’e komesa husi 2023 hahú dudu mais seidauk to’o remata, kona ba bee mos ami la’o ho ONG dala ruma inisiativa husi komunidade rasik mak halo kontribuisaun soe hamutuk fundus uituan hodi dada bee mos ba komunidade sira kada uma kain, maske nune’e maibé la sufisiente nafatin, entaun ami koko rekomenda ba parte leten mais ami seidauk iha resposta pozetivu ida, durante ne’e ami hato’o bebeik ona difikuldade hirak ne’e iha forum ne’ebá maibé seidauk nafatin, maibé ami nafatin kontinua esforsu la’o, iha parte governu nian tun direta ona maibé kepastian mai ami mak la iha” informa xefe aldeia Uiabobo.

 

Aliende ne’e iha aldeia refere iha  mos Bee manas ne’ebé konesidu ho naran Uaicana hanesan fatin turismo idane’ebé bele atrai vizitante sira husi munisipiu seluk inklui turista husi nasaun seluk atu vizita, tanba fatin refere ho nia Beleza ne’ebé furak bele garante vizitante barak atu asesu.

Enkuantu total komunidade iha aldeia Uaibobo hamutuk 676 kaka, no ho area jurídiku 27 maioria vida agrikultor.

 

Jornalista                   : Alex

Editór                         : Média RKDTL