PR FÓ APOIU EKIPAMENTU DESPORTU BA ESTUDANTE ORFANATU SANTA TEREZINHA QUELICAI

Baucau-05/09/2025-Média Defisensia, Prezidénsia Repúblika Demokratika Timor-Leste, husi Unidade Servisu Sosiédade Sivil no Apoiu Sosiál Palásiu Prezidensiál, fó apoiu ekipamentu Desportu ba Estudante Orfanatu Santa Terezinha de Menino Jesus (Don Bosco), Quelicai, Munisípiu Baucau.

Koordenadora Jerál  Unidade Servisu Sosiédade Sivil no Apoiu Sosiál Palásiu Prezidensiál, Tereza dos Santos Ximenes, entrega ekipamentu desportivu hanesan farda footbal 50 no voleibol 50  ba Estudante sira.

“Apoiu ida-ne’e mak inisiativa direta husi Prezidente Repúblika, José Ramos-Horta, ne’ebé atu hatudu nia solidariedade ba estudante sira, liu-liu iha orfanatu. Apoiu ekipamentu farda football 50, farda voleibol 50 no  sapatu 60 mai husi Prezidente nia doadór sira husi Honkong-Xina, ho objetivu atu fasilita estudante sira nia atividade ekstra-kurikular”,Dehan Koordenadora Jerál  Unidade Servisu Sosiédade Sivil no Apoiu Sosiál Palásiu Prezidensiál iha Quelicai, 03/09.

Koordenadora Jerál  Unidade Servisu Sosiédade Sivil no Apoiu Sosiál Palásiu Prezidensiál,  esplika katak parte husi ekipamentu mak hetan donasaun husi belun Prezidente Republika José Ramos-Horta nia belun di’ak iha Honkong-Xina, ne’ebé distribui liu husi Palásiu Prezidensiál.

Iha fatin hanesan, Enkaregadu Lar Santa Terezinha, Padre Albino Fernandes,  agradese ba Prezidente Republika ba apoiu ekipamentus desportu nian nune’e estudante sir abele utiliza ba hala’o atividade desportu iha eskola refere.

“Hau agradese ba Prezidente Republika ba Apoiu desportivu ida ne’e signifikadu tebes. Ne’e hatudu tebes Prezidente nia fuan nafatin iha estudante orfanatu sira, ne’ebé mak sai futuru Timor-Leste”, Apresia Padre Albino Fernandes.

Tuir Estudante Angelino Rui Gomes, estudante sira sente kontente  no apresia tebes ba Prezidente nia tulun ba sira iha orfonatu liuhusi apoiu ekipamentus desportu nian ba sira atu bele utiliza.

“Ami hato’o  gratidaun ho kontente ba Prezidente Republika  tanba sei bele oferese farda no bola ba  ami atu treina. Prezidente hatudu nia fuan bo’ot, hanoin ami iha orfanatu ne’e”, Tenik Estudante.

Entretantu, totál estudante husi orfanatu Santa Terezinha de Menino Jesus, Quelicai ne’e hamutuk 51, mai husi Munisipiu oioin, ne’ebé estuda hamutuk iha Lar Don Bosco Quelicai.

Jornatista  : RKDTL Asesu Liuhusi Pajina PR no Komunikadu.

Editor         : Média RKDTL