PITL HALO DISKUSAUN HO PARSERIU RELASIONA PROJETU INKLUZAUN DIVERSIDADE NE’EBÉ SUSESU IHA MUNISIPIU 3

 

Dili -30/07/2025-Media Defisiensia, Plan Internasional Timor-Leste realiza diskusaun ho parseriu sira halo mós reflesaun, hodi selebra susesu sira ne’ebé durante tinan rua sira hala’o projeitu Inkluzaun Diversidade ba komunidade sira.

Diretora Plan Internasional, Fatima Soares hatete, diskusaun ne’e realiza  hodi bele refleta fila fali projetu ne’ebé halo ona ba komunidade ho tema Futuru ne’ebé seguru nomos inklusivu, nune’e bele hatene susesu no implementasaun durante tinan rua halo iha Municipio tolu.

“Objetivu husi diskusaun ida-ne’e hodi haree Projetu ba  Futuru ne’ebé seguru no inklusivu, hamutuk, hodi selebra susesu husi tinan rua. Intervensaun  ne’ebé halo ona iha munisipiu sira liu-liu Municipio Ermera, Baucau, Dili no sira seluk, selebrasaun no reflesaun hodi bele hatene lisaun saida maka ita hetan ona iha komunidade, no pratika sira iha komunidade. Liuhusi projetu refere fokus ba area tolu 3 hanesan, hasa’e konsiénsia iha familia kona-ba importánsia  direitu maluk defisiénsia no LGBTIQ+, haforsa ekonomia no fó oportunidade ba ema ho defisiensia no LGBTIQ+. Treinamentu balun foka ba implementasaun no estatejia negosiu, hodi haforsa no empodera sira oinsa atu halo desizaun rasik ba sira nia aan husi negosiu atu bele ajuda sira iha nesesidade uma laran”, Dehan Diretora Plan Internasional, iha Salaun Delta Nova, 30/07.  

Diretora ne’e hatutan, liuhusi diskusaun ida-ne’e atu halo planu ba tinan lima ba oin tuir  rekomendasaun, ne’ebé simu  parte balun halo intervensaun ba projetu refere atu bele haluan tan pratika sira ba komunidade nune’e bele tau importansia no direitu ba maluk defisiénsia no LGBTIQ+.

Iha fatin hanesan Representante Embaixadór Uniaun Europeia, Lotam Lerer hatete, husi sira nia parte fó apoiu orsamentu baseia ba sira nia prosesu ba projetu ne’ebé implementa ona iha Municipio sira durante tinan 2 nia laran. Apoiu ne’e hodi suporta treinamentu sira ne’ebé implementa husi Plan Internacional, Arcoiris Timor-Leste nomos AHDMTL, hodi fasilita inklusaun diversidade ba komunidade.

“Ami apoiu fundus sira liuhusi projeitu sira  hala’o ona durante ne’e hanesan projetu Inklusaun Diversidade ba Ema ho Defisiensia nomos LGBTIQ+ ho montante apoiu osan  700.000 dolar Amerikanu. Projetu ida-ne’e hala’o durante tinan rua balun to’o ba tolu, tuir estandar ba projetu ne’ebé iha bazeia ba orsamentu ne’ebé ami apoiu”, Tenik Rep. Embaixadór Uniaun Europeia.

Embaixadór Salienta, orsamentu  ne’ebé  apoiu  atu bele implementa projetu inklusaun diversidade, hodi fasilita informasaun ba komunidade sira, atu  haforsa ema ho defisiensia nia direitu iha sosiedade nia le’et.

Entretantu, projetu Inklusaun Diversidade hetan fundus husi Uniaun Europeia no implementa husi Plan Internacional, Arcoiris Timor-Leste, AHDMTL no CBRNTL. Projeitu ne’e hala’o durante tinan 2 no sei ensera iha fulan ne’e.

Jornalista  : Geraldino Magno

Editor : Média RKDTL