FUNDASAUN AHISAUN LANSA FORMASAUN KOMPUTADOR IHA MUNICIPIO ERMERA

 

Dili-30/07/2025-Media Defisiensia, Asosiasaun Fundasaun Ahisaun halo lansamentu Formasaun kursu komputador, iha Municipio Ermera Postu Administrativu Railaku Villa  suku Railaku Kraik, hodi fasilita  Formasaun ba joven sira no  ema ho defisiensia.

Diretora Fundasaun Ahisaun, Ermenciana Alves hatete, lansamentu ba formasaun ida-ne’e hodi bele tulun joven no maluk defisiensia sira iha postu Administrativu Railaku, hodi kapasita sira nia kapasidade iha area komputador nian, nune’e ba futuru  sai hanesan bukae ida ba sira.

“Fundasaun Ahisaun  agora daudaun fokus liu ba iha Edukasaun, edukasaun formal no edukasaun informal, tanba ne’e ohin loron ami halo lansamentu komputador ba ema hotu espesial ba maluk ho defisiensia sira. Ami mos  husu ba komunidade sira ne’ebé maka iha fatin ida ne’e ba mos  Xefi Aldeia,no  kordenador edukasaun atu hare’e mós ita nia maluk balun ne’ebé ho defisiensia karik sira iha interese atu kursu bele mai kursu  formasaun ida ne’e loke  gratuita ba maluk sira ne’ebé ho defisiensia. Husi organizasaun sei iha planu  balun sei loke tan eskola sekundario tekniku vokasional, formasaun lian ingles nomos lian corea hodi bele fasilita maluk ho defisiensia no la ho defisiensia iha futuru”. Dehan Diretora iha fatin lansamentu Postu Administrativu Railaku Villa, 30/07.

Diretora ne’e hatutan, husu ba komunidade, xefe Aldeia no  kordenador eskola atu kopera ho Fundasaun Ahisaun nune’e planu sira ba futuru bele sai susesu liutan. Tanba ita  koalia liu kona- ba inkluzivu  ita  tenke kopera hamutuk atu bele lao ho susesu.

Iha fatin hanesan Xefe Aldeia Suku Railaku Kraik, Matias Maria Salsina hatete, hato’o agradese ba Asosiasaun Fundasaun Ahisaun ne’ebe lansa ona formasaun kursu komputador iha suku refere, husi oportunidade ida ne’e hodi bele fasilita jovens nia kapasidade.

“Hanesan  Autoridade  ami nafatin kopera ho Fundasaun Ahisaun  atu nune’e ba oin sei iha posibilidade bele aumenta tan kursu seluk hanesan kursu lian Ingles, lian korea atu nnune’e ami nia joventu sira no ami nia inan aman sira ne’ebé mak iha oportunidade hakarak tuir kursu ida no  bele aproveita ho di’ak ba futuru. Hanesan  joven ne’ebé maka kreativu presija tenki  partisipa no  aproveita ho didi’ak  tempu sira hanesan, tanba tempu sira hanesan ne’e tempu osan mean defisil mai ita atu hetan”. Tenik Xefi Aldeia Suku Railaku Kraik.

Xefi Aldeia ne’e salienta liuhusi formasaun ida ne’e husu jovens sira atu aproveita ho di’ak atu bele kapasita nia kapasidade. Rekomenda mos ba Fundasaun Ahisaun karik ba futuru bele aumenta tan formasaun sira seluk atu bele kapasita jovens sira.

Entretantu, Lansamentu refere husi Diretora Fundasaun Ahisaun hamutuk ho Xefe Aldeia Suku Railaku Kraik, no partisipa masimu husi grupu no staff Fundasaun Ahisaun nomos komunidade husi suku refere.

Jornalista  : Eufrozina no Leticia

Editor       : Média RKDTL