PLAN INTERNATIONAL, AHDMTL NO ARCOIRIS TL REALIZA TREINAMENTU SOGIESC NO TERMONOLOJIA BA JORNALISTA

Dili-23/06/2025-Media Defisiensia, Plan International, implementa projeitu inklusaun diversidade hamutuk ho Asosiasaun Halibur Defisiensia Matan Timor-Leste nomos Asosiasaun ARCOIRIS Timor-Leste, realiza treinamentu ba jornalista sira kona-ba termonolojia ba ema ho defisiensia no LGBTIQ+.

Tuir Jerente projeitu Inklusaun Diversidade Plan International,  Livania Gomes hatete, projeitu ba treinamentu ida ne’e  implementa liga liu ba parte jornalista sira nia kapasidade iha hakerek notisia ka foti informasaun ruma husi ema ho defisiensia no LGBTIQ+ atu bele uza termonolojia ne’ebe mak los no dignu la ho deskriminasaun.

“Projeitu ida ne’e ami hala’o no implementa hahu  iha tinan kotuk iha Municipio Ainaro nomos Ermera, no tinan ida ne’e ami hala’o iha Municipio Dili. Treinamentu ida ne’e hala’o atu refresing no kapasita jornalista sira tamba ita hatene katak jornalista maka matan no tilun ba ema hotu, tamba ne’e atu bele komprende termonolojia sira liga ba asuntu inklusaun social, liu husi  materia SOGIESC ne’e  rasik”, Dehan  Jerente Projeitu Inklusaun Diversidade iha salaun ALFAELA, 19/06.

Jerente ba projeitu ne’e hatutan, projeitu ne’e implementa laos ba de’it jornalista ka media sira, maibé fasilita mos ba familia defisiensia no LGBTIQ+ sira nomos ba komunidade no Autoridade local iha Municipio sira. Tamba ita hatene dalabarak liu liafuan diskriminasaun mai husi familia ka komunidade.

 “Durante projeitu implementasaun ami seidauk rekolha dadus ne’ebe los ba iha ema ho defisiensia no LGBTIQ+, maibe tuir Asosiasaun ARCOIRIS Timor-Leste rekolha dadus ema LGBTIQ+ hamutuk 700 e tal ne’ebé rejistu husi tinan 2016 ate agora. Dadus husi Ema Ho Defisiensia tuir sensus populasaun Timor-Leste hamutuk 38 mill e tal iha tinan 2015 ne’ebe maka agora dadaun sei nafatin uza hela dadus refere seidauk rekolla dadus foun”. Dehan Livania Gomes

Entretantu, Projeitu ne’e hetan apoiu fundu husi Uniaun Europeia no implementa husi Plan International no guia  aplikante rua AHDMTL no ARCOIRIS TL. Treinamentu refere hala’o durante loron rua iha loron  19 no remata  20, partisipa husi jornalista media sira hanesan Lafaek news, Sapnews, jornal independent,Tatoli, RKDTL, media Televizaun demokrasia,  RTTL, Radio Comoro, Média Loluwari.

Jornalista : Geraldino & Efifania

Editor      : RKDTL