PR VIAJEN BA SINGAPURA, PARTISIPA IHA SIMEIRA SEGURANSA ÁZIA NIAN BA dala-22

 

Dili-30/05/2025-Média Defisiensia, Prezidente Republika Demokratika Timor-Leste, halo viajen ba Singapura iha loron 29 fulan-Maiu to’o loron 4 fulan-Juñu tinan 2025,  hodi partisipa iha Simeira Seguransa Ázia nian ba dala 22, ne’ebé koñesidu ho naran IISS Shangri-La Dialogue.

Prezidente Republika José Ramos-Horta, hatete simeira rekoñesidu nu’udar forum primeiru ba diálogu defeza no seguransa iha rejiaun Azia-Pasifiku, halibur hamutuk ofisiál seniór sira governu nian, ministru defeza sira no peritu seguransa sira husi mundu tomak, hodi koalia kona-ba dezafiu krítiku sira ba seguransa rejionál no internasionál.

“Hau sei hato’o deklarasaun prinsipál iha Sesaun Plenária datoluk kona-ba “Jestaun Proliferasaun Risku sira iha Ázia-Pasífiku” no sei aprezenta Timor-Leste nia perspetiva kona-ba arma nukleár no proliferasaun teknolojia míssil sira iha rejiaun. Hau sei partisipa mós iha Mesa Redonda Prezidensial ba Lideransa Foin-sa’e sira, hodi fahe reflesaun sira kona-ba papél parseria estratéjika sira-nian iha reforsu arkitetura seguransa rejionál iha Ázia-Pasífiku no tuirmai sei hatán ba pergunta sira ne’ebé líder foin sira ne’ebé prezente husu”, Dehan PR liuhusi KI, 29/05.

Hatutan tan Prezidente Ramos-Horta, sei partisipa iha sesaun plenária oioin ne’ebé kobre tópiku kritiku sira hanesan seguransa Indo-Pasífiku, dezafiu sira defeza sibernétika no espasu liur, no parseiru seguransa globál Xina nian.

“Partisipasaun ne’e reflete envolvimentu Timor-Leste nian ne’ebé buras iha asuntu seguransa rejionál no ninia kompromisu atu kontribui konstrutivamente ba estabilidade Ázia-Pasífiku. Nu’udar nasaun ida ne’ebé tranzisaun ho susesu husi konflitu ba pás ho apoiu internasionál, Timor-Leste oferese koñesimentu valiozu kona-ba rezolusaun konflitu, konstrusaun dame, no dezenvolvimentu demokrátiku”, Subliña Prezidente Republika.

Entretantu, Tanba Simeira ne’e sei iha sesaun plenária oioin, diskursu espesiál sira, no sesaun servisu simultáneu ne’ebé kobre inovasaun defeza, jestaun krize rejionál, no kooperasaun seguransa marítima. Sei remata ho diskusaun kona-ba hametin kooperasaun seguransa ba Ázia-Pasífiku ne’ebé estável. sei sorumutu bilaterál ho lideransa Singapura nian, inklui S.E. Tharman Shanmugaratnam, Prezidente Singapura, S. E. Lawrence Wong, Primeiru Ministru Singapura, no Chan Chun Sing, Ministru Defeza.

Jornalista  : RKDTL Asesu liuhusi Komunikadu Imprensa 

Editor        : Editor  RKDTL