PM KONGRATULA AESPNTL NIA ANIVERSARIU BA DALA II EZISTE IHA TL

DILI-07/05/2025-Media Defisiensia, Primeiro Ministro partisipa iha aniversariu Asosiasaun Espozo no Espoza Polisia Nasional Timor Leste (AESPNTL) nian ba dala rua, hanesan reflesaun ba ema hotu liuliu Asosiasaun refere atu nafatin hasa’e dedikasaun no profesionalismu hodi asegura rai ne'e.

Primeiro Ministro Kay Rala Xanana Gusmão, fó parabens ba Asosiasaun Espozo no Espoza Polisia Nasional Timor Leste, nia aniversariu ba dala rua iha rai laran, la’o di’ak tebes no buka atu hametin harmonia la’os de’it iha uma laran mais entre sira hotu iha timor tomak.

“Hau mai partisipa segundu aniversariu ASPNTL nian di’ak tebes sira eziste tinan rua ona sira halo no buka atu hametin harmonia la’os de’it iha uma laran mais entre sira hotu iha timor tomak no hakbesik aan ba komunidade sira no buka mós rezolve problema balun ne’ebé iha vizinñu sira.  Fó parabens ba ASPNTL mak prezidente nia ezersisiu ne’ebé di’ak tebes husu boot ita mós apoiu ba sira, tanba sira la tama PNTL maibé ho ida ne’e atu ajuda sira nia espoza no espozo iha PNTL, hodi bele kumpri di’ak liu misaun no kria harmonia no disponibilidade iha ita nia rai”, Dehan PM iha Salaun CCD Merkadu Lama Dili, 06/05.

Iha fatin hanesan Presidente ba Subtituisaun, aktual  Vise Presidente AESPNTL Laticha Valente Goncalves hatete, aniversariu ida-ne'e hanesan oportunidade ida hodi renova fila fali objetivu atu reforsa espiritu uniaun no kontinua promove no desenvolve abilidade sira.

"Ohin loron sai hanesan momentu nebe importante ba Asosiasaun Espoza no Espozo Polisia Nasional Timor Leste. Ohin la’os de’it ita selebra aniversariu AESPNTL ne’ebé, liu ona iha dia 27 de Abril 2025, maibé sai hanesan reflesaun ba ita hotu liu-liu ba AESPNTL sira, atu nafatin hasae dedikasaun no profesionalismu hodi halo atendementu, ba ita nia Espozo no expoza PNTL sira hodi bele asegura rai ida-ne’e, tanba ita nia povu iha esperansa PNTL atu sai Instituisaun, ne’ebé transparensia, akuntavél no hetan fiar", Dehan Presidente ba Subtituisaun aktual  Vise Presidente AESPNTL.

Presidente ba Subtituisaun aktual  Vise Presidente AESPNTL hatutan tan, tema ba selebrasaun ba aniversariu AESPNTL ba dala rua " Hamutuk Reforsa Amizade no Familiaridade AESPNTL" hodi komemora loron aniversáriu asosiasaun nian ho abreviasaun. Ami espressa profunda gratidaun ba hotu-hotu ne'ebé, kontribui ona iha programa seminariu ohin, hodi partilla esperensia no koñesimentu, estimula diskusaun no debate sira, nu'udar reflesaun bo'ot ida, ba loron espesial AESPNTL nian, hodi hetan ninia impaktu positivu, atu aprofunda partisipante AESPNTL sira nia koñesimentu, hodi bele promove redi, entre parte relevante sira, no estabelese relasaun profesionais no pessoal iha desenvolvimentu asosiasaun ne'e rasik”, Tenik AESPNTL Laticha Valente.

Rekomendasaun balun ba Parte Governu, ne'ebé responsavel hodi bele apresia ba pedidu ne’ebé hato’o hanesan, Kria Dekretu Governu ida, ba tranferensia Membru PNTL (Laen/fe'en sira) atu ninia Espoza/Espozo no oan sira. Kria Diploma Ministerial ida kona-ba diskrisaun servisu ba papél esensial AESPNTL. Formasaun Espesifiku ba Expoza ka esposo sira, hodi aumenta sira nia konesimentu iha abilidade lideransa sira. Subsidiu ba familia, hodi bele responde nesesidade familia nian, apoiu Transporte ba Nivel Nasional, Unidades, no Munisípiu sira. Apoiu fatin servisu ne'ebé adekuadu iha Komandu Nasional, Unidade to'o Munisipiu sira. Apoiu Fornesementu fardamentu ba AESPNTL kada tinan rua (2).

Entretantu, partisipa iha selebrasaun aniversariu AESPNTL nian Primeiru Ministro Kay Rala Xanana Gusmão, Komandante PNTL Munisipiu 13 inklui RAEOA, Atauro, Komandu UEP, UPF no UPM.

Jornalista : Geraldino Magno

Editor  : Média RKDTL