ME FASILITA FORMASAUN BA JORNALISTA RELASIONA ENKUANDRAMENTU JURÍDIKU IHA ÁREA EDUKASAUN

Dili-12/05/2025-Média Defisiensia, Ministeriu Edukasaun fasilita formasaun ba Jornalista sira husi média online, televizaun, rádiu no jornal kona-ba Sistema edukasaun, estrutura eskola, rejime karreira no prosedimentu rekrutamentu dosente liuhusi bolsa kandidatu.

Diretór Relacão Pública no Protocolo Ministério Educacão, Olandino Godinho Ciqueira, hatete seminariu ne’e hanesan oportunidade atu jornalista sira bele hetan informasaun kona-ba sistema edukasaun, no rejime legál aplika ba edukasaun nune'e fasilita servisu jornalista, hodi hetan informasaun ne’ebé lo’os tuir regra no prosedimentu aplikável.

“Seminariu ne’e oportunidade ba jornalista atu husu klarifikasaun kona-ba kestaun balun relevante ba prosesu iha área edukasaun. Iha seminariu refere mós aprezenta báze legál relevante ba área edukasaun no hatudu oinsá mak jornalista bele asesu no halo leitura ba dokumentu relevante husi edukasaun ne’ebé hare’e liu ba eskola no mós karreira dosente”. Dehan Diretór Olandino, Iha Studi média ME Vila Verde, 09/05.

Diretór ne’e hatutan Jornalista sira iha oportunidade atu husu informasaun klaru kona-ba asuntu balun ne’ebé sempre mosu iha notísia hanesan idade ka otas, atu tama ba ensinu báziku, falta professor/a no mós kolokasaun liuhusi Bolsa Kandidatu, inklui subsídiu ba dosente foun.

“Tuir lei baze edukasaun idade atu tama ba ensinu báziku mak tinan 6 ne’ebé kompleta tinan molok hahú eskola, nune’e idade lolo’os mak labarik tama ho otas 6 no halo tinan 7. Regra refere antes ne’e la kumpre husi eskola sira maibé hahú tinan 2 ona eskola sira hetan informasaun klaru no manuál hodi halo matríkula tuir kuadru legál. Faktu katak pré-eskola mós agora oferese iha área oi-oin iha teritóriu tomak asegura katak labarik ne’ebé idade seidauk to'o tinan 6 bele hahú eskola iha pré-eskolar”, Afirma Diretor ME.

Iha fatin hanesan fasilitadora Jurísta Gabinete Jurídico Ministerio Educacão Bárbara Oliveira, esplika Ministeriu Edukasaun hare liu ba kuadru pesoál, tanba sai hanesan instrumentu ne'ebé determina professór hira mak eskola ida presiza. Númeru profesór depende ba eskola nia nível ensinu, kurríkulu no karga orária no mós númeru estudante no númeru turma. Ministériu Edukasaun aprova ona kuadru pesoál ba eskola ensinu báziku no pré-eskola públiku hotu-hotu iha tinan 2024.

“Eskola barak maka seidauk toman atu uza kuadru pesoál tanba maneira ne’e  foun  presiza tempu  atu eskola sira  bele hatene jere sira-nia rekursu umanu tuir kuadru pesoál.  Dalaruma mós, tuir esplikasaun, eskola la’ós la iha dosente, maibé iha dosente ne’ebé la hanorin tanba moras prolongadu ka razaun seluk”, Tenik Fasilitadora Jurísta Gabinete Jurídico ME.

Enkuantu ba oras ne’e bolsa kandidatu ba Siklu 1 no 2 Ensinu Báziku ne'ebé koloka ona sei hela kandidatu 1259, ho feto 766, tuir publika liuhosi Despaixu Ministeriál nú. 05 /2025 de 13 de fevereiro. Tuir informasaun Ministériu Edukasaun fahe, iha fulan Maio espera sei halo xamada ba 150 resin kandidatu iha Bolsa Kandidatu ne'ebe taka vaga husi dosente mate no reforma.

Entretantu, Seminariu refere partisipa hosi Media 13, inklui jornalista 26, ho feto 12 seminariu refere mós partisipa hosi funsionáriu tékniku Ministériu Edukasaun iha área rekursu umanu, no protokolu, mídia no jurídiku.

Jornalista : Eufrozina Bras

Editor      : Média RKDTL