PNTL SOSIALIZA PLANU PSIKOSOSIAL BA DEZENVOLVIMENTU NASIONAL BA ESTUDANTE ISC

Dili-23/04/2025-Média Degfisiensia, Polisia Nasional Timor-Leste (PNTL), liuhusi Komandu Jeral Diresaun Polisiamentu Komunitariu realiza “Asaun Sensibilizasaun Planu Psikososial ba Dezenvolvimentu Nasional ba Estudante Institutu Superior Cristal (ISC), hodi mantein paz no estabilidade iha komunidade nia leet.

Tuir Segundu Komandante Jerál PNTL Komisariu Polísia Pedro Belo, Abertura atividade Sensibilizasaun Planu Psikososial ba estudante ISC sira, hodi fahe informasaun sira relasiona ho problema ne’ebé akontese barak iha komunidade nia leet liuliu kazu violensia fiziku tanba haree husi estatistika krimi nian.  

“Topiku ida ne’e relasaun ho problema lubuk ida ne’ebé akontese iha ita nia komunidade nia leet tuir estatistiku krimi ninian, durante ne’e ita haree katak kazu violensia fiziku ne’ebé aas tebes hanesan kazu asaltu ne’e envolve joven foinsa’e sira katuas sira la’e joven sira mak halo problema iha komunidade nia leet no dala ruma mós akontese iha eskola. Ita mós haree tuir mai iha kazu violensia domestika sa’e makas iha segundu lugar iha estatistika. Tanba saida mak feto sira sempre vitima, bainhira hola malu feto sempre vitima tanba ne’e mak ita presiza tebes iha programa importante atu hakbesik ba parte eskola liuliu universidade hodi sosializa informasaun sira, Hatete Segundu Komandante Jerál PNTL Komisariu Polísia iha Salaun Institutu Superior Cristal, Balide, 23/04.

Segundu Komandante Jerál PNTL Komisariu Polisia hatutan tan, parte seluk mak violasaun sinais tranzitu nian, iha pontu estrada liuliu iha fator umanu ne'e makas tebes kada tinan sempre rejistu numeru ema mate ba asidente ne'e barak tebes, hosi sensibilizasaun ne’e atu haree fali tanba sa kazu sira akontese  ho programa ne’e bele prevene ho neneik.

"Ita presija halo sosializasaun kona-ba Psikososial ita koalia aspetu ambiental, Saude mental no aspetu opiniaun sira atu bele haree ba ita nia atetude, rasa sosial. PNTL mai iha parte universidade, tanba ema hotu hatene estudante sira nia siénsia eleba ona hosi eskola sekundariu to'o universidade no aprende iha siensia ne'ebé avansadu tebes, maibé sosializasaun ne'e importante atu halo mudansa ba karakter komunidade, nune'e estudante sira labele halo problema iha komunidade nia leet nomos iha eskola”, Afirma Segundu Komandante Pedro Belo.

Akresenta tan Segundu Komandabte, husu ba Estudante sira iha obrigasaun, dever ida atu lori paz no unidade ba komunidade sira nia leet, karik joven balun kria problema ruma husu ba estudante sira hotu atu koalia nafatin paz hodi halo mudansa iha komunidade nia leet liuliu iha uma laran, tenke influensia no lori siénsia ne'ebé mak aprende ona iha eskola aplika tutan ba ema seluk iha sosiedade nia laran.

Iha fatin hanesan Reitor Institutu Superior Cristal Sebastião Pereira, fó agradese ba PNTL ba servisu hamutuk, hodi fahe informasaun kona-ba Psikososial ba estudante sira, tanba ne’e husu ba estudante hotu tenke kria paz no estabilidade iha komunidade nia leet.

"Ha'u husu ba estudante sira ohin imi tuir ona sosializasaun ne'e ba ho komandante sira tenke fokus lalika tama sai, tanba ida ne'e importante tebes duni atu oinsa bele muda ita nia karakter atu kria paz no estabilidade iha komunidade no iha eskola. Liuhusi sosializasaun ne'e kona-ba orden públiku ka Polisia Komunitariu nian, ne'ebé importante tebes ba estudante sira bele lori hodi ba aplika iha soiedade sira nia leet," Tenik Reitor ISC.

Jornalista : Geraldino Magno

Editor       : Média RKDTL