ADTL LANSA LIVRU DIREKTORI MEMBRU ORGANIZASAUN EHD NIAN

 

Dili-04/03/2025-Média Defisiensia, Asosiasaun Defisiensia Timor-Leste (ADTL), hamutuk ho parseiru sira, realiza lansamentu ba livru direktori membru organizasaun Ema ho Defisiensia nia profile organizasaun iha Timor-Leste.

Diretor Ezekutivu ADTL Cesario da Silva hatete, eventu lansamentu livru kona-ba profile organizasaun EhD nian, nune’e bele hafasil ema hotu bele hatene organizasaun Defisiensia sira, ida-idak nia servisu no kria atividade formasaun sira no fó terapia ba EhD hotu.

“Atividade prinsipal mak lansa livru direktori membru organizasaun sira hotu diretori ida ne’e kompostu husi profile organizasaun ida-idak nian hamutuk ho parseiru sira hotu hodi taumatan ba EhD entaun informasaun kona-ba organizasaun membru no parseiru sira inklui liña ministerium sira ne’ebé hola papel importante ba asuntu inkluzaun liuliu sira hola parte iha planu asaun nasional no instituisaun sira ne’ebé halo servisu hatan direta ba EHD hanesan CNR no sira ne’ebé halo atividade iha relasaun ho asuntu defisiensia ho profile ida ne’e informasaun kompletu liuliu membru organizasaun sira nia formasaun no parseiru sira inklui diresaun ida-idak nia responsabel sira”, Dehan Diretor ADTL iha Salaun Suai Room Timor Plaza, 28/02.

Diretor hatutan tan objetivu husi lansa livru ne’e atu tulun parseiru sira hotu, EHD, autoridade sira liuliu autoridade públiku no lokal sira, atu bele buka hatene ka identifika EHD nia nesesidade sira organizasaun ida ne’ebé mak halo papél ba ida ne’e, hodi bele halo liña komunikasaun no asegura EHD bele asesu ba oportunidade inklui hetan atendimentu husi instituisaun ne’ebé halo papél ba ida ne’e.

“Lansa livru ne’e atu tulun parseiru sira hotu, EHD, autoridade sira liuliu autoridade públiku no lokal sira, atu bele buka hatene ka identifika EHD nia nesesidade sira. Livru ne’ebé produs mai husi organizasaun sira no parseiru sira asosiasaun rekolla informasaun husi sira, hodi produs livru ne’e ba ona públiku bele asesu atu halo komunikasaun no haree formasaun organizasaun sira realiza bele tuir no ema ne’ebé presiza terapia sira bele komunika ho instituisaun ne’ebé servisu kona-ba terapia CNR no sira seluk tan, Livru ne’ebé produs halo parseria ho DFAT, Australia no parseiru dezenvolvimentu umanu.

Iha fatin hanesan Representante Embaixadór Australia iha TL Felicyti dehan, fó parabens ba organizasaun hotu no apresia ba servisu hamutuk entre organizasaun no parseiru sira seluk iha oportunidade ne’e hodi kria sosiedade ne’ebé inkluzivu ba ema hotu iha Timor-Leste.

“Hau espera ita hotu hatene atividade ne’e atu tulun tebes ema seluk ho maluk defisiensia sira, ita bele servisu hamutuk atu bele iha oportunidade tan hodi kria sosiedade ne’ebé inkluzivu ba ema hotu iha TL. Ami sente bele lao hamutuk, hau hakarak hato’o parabens ba ADTL no organizasaun EHD sira hotu iha TL ba ita nia lansamentu teritoria ida ne’e sei ajuda EHD iha TL, hodi asesu ba oportunidade sira iha munisipiu hotu. Hau orgullu Australia bele apoiu relatoriu ida ne’e hakarak ita servisu hamutuk ba tempu naruk hau espera sei ajuda ita boot sira iha ita nia servisu nomos ajuda EhD iha rai hotu atu asesu ba oportunidade no servisu sira”, Tenik Representante Embaixadór Australia.

Entretantu, iha lansamentu livru Direktori Membru Organizasaun EhD nian, partisipa husi parseiru dezenvolvimentu umanu, membru organizasaun no Reprezentante Embaixadór Australia Iha TL, dadaun ne’e dadus Ema ho Defisiensia iha tinan 2022 total hamutuk 17 mil iha kondisaun defisiensia iha Timor-Leste. 

Jornalista  : Geraldino & Elo (Estajiadu)

Editor   : Média RKDTL