LANSA SHINE INTERNATIONAL SCHOOL BA ESTUDANTE HO IDADE TINAN 1 FULAN 8 TOO 5

 

DILI-17/01/2025-Média Defisiensia, SHINE International School konklui lansamentu ba eskola refere, hodi hahu prosesu apredisajem ba estudante ho idade tinan 1 fulan 8 too idade tinan lima.

Tuir Koordenadora eskola SHINE Natercia da Silva Maria Loubato hatete atividade lansamentu ba eskola SHINE International School ne’e, hodi hahu prosesu apredisajen ba estudante sira no eskola nia vizaun no misaun atu akumula, kuidadu no hadomi estudante sira ho tinan ida fulan 8 ba leten hodi hanorin sira ho lia ingles.  

“Ita nia vizaun no misaun maka atu akumula, kuidadu no hadomi estudante sira, dadaun ne’e estudante hamutuk 82 husi 21 mk ema ho defisiensia nia oan no seluk husi inan aman ne’ebé iha voluntariamente hakarak haruka oan eskola iha ne’e, liuhusi servisu hamutuk mak ita bele kompleta operasional ba eskola. iha eskola ne’e iha teacher ida no asistente ida, teacher hamutuk 16 iha eskola SHINE no teacher nain tolu mai husi rai liur, husi espesialidade area edukasaun. Ami iha mehi ba futuru ami bele harii mós eskola international ne’e iha munisipiu seluk, maibe agora dadaun ami lao ho saida mak ami bele, edifisu refere suporta husi inan aman balu nia apoiu”, Dehan Koordenadora eskola SHINE Natercia iha Eskola Manleu, 17/01.

Koordenadora Eskola SHINE hatutan tan eskola mós oferese kursus ba labarik ho idade tinan 8 ba leten atu bele tuir kursu piano, gitar, violin no ingles. Eskola refere atu dedika labarik kiik ho idade tinan ida fulan 8 ba leten bele ba aprende no iha SHINE International School lokaliza iha aldeia Mane Mesak Suku Manleuana, Postu Dom Aleixu, Munisipiu Dili. Eskola refere rejistu 30$, konstrusaun 30$ reservatoriu 5$, kada fulan selu full time selu 100$ no part time 50$ osan farad 70$ no eskola seluk kedas fulan ida antes hahu aula, eskola hahu tuku 8:00 too 12 :00 ne’e ba part time ba full time hahu 8:00 too 5:30.

Iha fatin hanesan representante inan aman Gaspar Afonso akresenta, hanesan familia orgullu ho estrutura eskola refere tanba iha hanoin di’ak, hodi oferese tempu ba hanorin labarik sira ho idade ne’ebé kiik ho lian ingles. Apresia ho sira nia dedikasaun hodi prepara labarik sira ba futuru tanba labarik sira mak futuru nasaun nian.

“Sente orgullu no kontete tanba koordenadora ho nia ekipa ho idade ne’ebé sei joven iha hanoin di’ak, hakarak oferese sira nia tempu ba labarik sira hodi hanorin lian ingles, tanba kuidadu ema seluk nia oan ne’e difisil tebes. Ami bele lori ami nia oan mai aprende buat ruma iha eskola ne’e hodi prepara ba futuru no servi ba familia, sosiedade no rai ne’e. Hau nia oan bele mai hola parte iha ne’e no maluk defisiensia sira seluk nia oan mai aprende iha ne’e, tanba iha konstituisaun RDTL artigu 16 hatete halo tratamentu ne’e la haree ba rasa, koor, etnia, fiziku no mental iha lina primeiru hatete ema hotu iha lei nia oin hanesan, ami defisiensia nia oan mos bele partisipa iha setor saida de’it”, Tenik Gaspar.

Jornalista : Geraldino Magno

Editor       : Média RKDTL