FAMÍLIA SALESIANU DOM BOSCO PARTISIPA MISSA ABERTÚRA SENTENÁRIU(100) SALESIANU MAI TIMOR-LESTE IHA FATUMACA

 

Fatumaca -01/02/2025-Média Defisiénsia ,Loron 31 Janeiru nu’udar loron ne’ebé signifikativu tebés ba Família Saleziana iha mundu tomak, inklui Timor-Leste. Iha loron ne’e, Kreda selebra Festa Saun João Bosco nian, Fundadór Kongregasaun Salezianu no apóstolu bo’ot  foin-sa’e nian.

Dom. Bosco dedika nia moris ba Edukasáun no evanjelizasaun ba foin-sa’e sira, liu-liu sira ne’ebé kiak liu nó abandonadu liu. Nia fiar katak dalan di’ak liu atu forma sarani di’ak no sidadaun ne’ebé Onestu mak liu husi Relijiaun no Domin, prinsípiu sira ne’ebé sai baze ba Dom Bosco ninia sistema edukasionál.

Bá Família Saleziana, loron ida-ne’e nu’udár moméntu espesiál selebrasaun, orasaún no renovasaun empeñu ba misaun Saleziana. Iha eskola sira, parókia sira, sentru foin-sa’e sira no komunidade relijioza saleziana sira iha mundu tomak, inklui Timor-Leste, hodi hala’o Missa Festiva iha momentu reflesaun kona-ba Dom. Bosco nia ligadu, ho atividade kulturál no eventu sira ba foin-sa’e sira.

Iha tinan-2025, ida ne’e, selebrasaun ne’e mos iha signifikadu kle’an liután ba Timor-Leste, tanbá kona-mo’os ho aniversáriu ba dala atus ida (100) Espedisaun Saleziana Dahuluk to’o iha Rai Doben ida ne’e. Ida-ne’e reforsa impaktu no importánsia misaun Saleziana nian iha formasaun ba foin-sa’e Timor oan sira iha sékulu ida-ne’e.

Abertura Missa Agradesimentu ba Senténária Presenza Salezianu iha Timor-Leste, hala’o iha Santuáriu Maria Auxiliadora Fatumaca-Baucau, iha nia  signifikadu espirituál, edukativu no istóriku ne’ebé kle’an ba Timor-Leste. Hahú husi espedisaun saleziana dahuluk iha rai ne’e, Fatumaca sai nu’udar sentru fiar nian, edukasaun no formasaun ba foin-sa’e timor oan sira.

Santuáriu Maria Auxiliadora iha Fatumaca la’ós de’it fatin ba orasaun nian, maibé mós símbolu misaun saleziana nian iha Timor-Leste. Hó evanjelizasaun, edukasáun no formasáun ba foin-sa’e sira, Salezianu sira kontinua banati tuir Dom. Bosco nia Karisma, hodi fó tulun nafatin ba foin sae timor oan atu harii futuru di’ak ba jerasaun fo’un sira.

Selebrasaun Senténáriu ida-ne’e signifikadu tebés iha ita rain hodi marka sékulu ida evanjelizasaun, edukasáun no servisu nian husi Kongregasaun Saleziana ba povu timor oan, liu-liu foin-sa’e sira.

Misa agradesimentu ne’ebé hala’o iha Igreza Santuáriu Filhas de Maria Auxiliadora Fatumaca ne’e, prezide direta husi Representante Santa Sé iha Timor-Leste, Monsenhor Marco Sprizzi. Hetan mos partisipa husi Prezidente Repúblika José Ramos Horta, Líder Nasionál Lere Anan Timur, Provedór Virgílio da Silva Guterres 'Lamukan', Membru Parlamentu Nasionál, familia Saleziana Don Bosco no sarani sira.

Jornalista  : Anselmo  Martins

Editor        : Média    RKDTL