APC-CNOPC REGISTU UMA 5 HETAN ESTRAGUS NO MATE IDA

 

Dili-20/01/2025-Midia Defisiensia, Autoridade Protesaun Sivil no CNOPC iha loron 13 too 20 fulan Janeiro tinan ne’e, durante semana ida rejistu familia uma-ka’in hamutuk 5 hetan estragus husi dezastre, ne'ebé akontese iha munisipiu neen (6).

Xefe Relasaun Externa no Komunikasaun APC, Nelson de Jesus Orleans afirma, durante akontesementu dezastre iha munisipiu Neen, APC registu uma latama kriteria, apoiu deit emerjensia uma ida, no numeru uma ne’ebé priense kriteria ka afetadu hamutuk 5, nune’e APC munisipiu apoiu kedas emerjensia ba vitima sira ne’ebé hetan dezastre.

"Durante semana ida nia laran iha munisipiu 6 Autoridade Protesaun Sivil, rejistu xefi familia uma-ka’in hamutuk 5 hetan estragus husi dezastre naturais ne'ebe akontese ba ema afetadu 27", Dehan Xefe Relasaun Externa APC iha Salaun Konferensia APC Kaikoli, 20/01.

Xefe Relasaun Externa hatutan, iha munisipiu 6 mak APC registu uma 5 ne’ebé hetan estragus husi, anin sobu 3 no ahi han 2, hetan estragus husi dezastre ne’ebé akontese durante semana ida nia laran.

"Munisipiu Neen ne'ebé hetan estragus hanesan Munisipiu Aileu Posto Administrativu Aileu Suku Hoholau, Aldeia Maururia iha loron 14 fulan Janeiro tinan ne’e akontese Rai lakan fera ema ida ho naran Joel de Araújo ho idade 14, Munisipiu Baucau, Postu Venilale, suku Fatulia, Aldeia Bahadato, iha loron 12 fulan Janeiro, akontese ahi han komunidade nia uma ida, Munusipiu Dili, Postu Dom Aleixo Suku Bairu-Pite, Aldeia Tane Timor iha loron 10 fulan Janeiro, akontese ahi han komunidade nia uma ida maibe apoiu emerjensia de’it, Postu Cristo Rei, Suku Becora, Aldeia Darlau iha loron 11 fulan Janeiru akontese anin sobu komunidade nia uma ida, Munisipiu Ermera, Postu Ermera, Suku Riheu, Aldeia Gumhei iha loron 12 fulan Janeiru akontese anin sobu komunidade nia uma ida, Munisipiu Manufahi, Postu Same, Suku Holarua, Aldeia Urufu iha loron 11 fulan Janeiru, akontese anin sobu komunidade nia uma ida no Munisipiu Viqueque, Postu Viqueque, Suku Carau Balu, Aldeia Lamak-Klaran iha loron 13 fulan Janeiru akontese mota lori labarik mane ida maibe sedauk hetan", Tenik Xefe Nelson.

Entretantu, vitima ba dezastre naturais sira oras ne’e hetan ona apoiu emerjensia husi komandu APC ho parseriu relevante sira, iha munisipiu ida-idak apoiu ai-han no laos aihan, komandu operasional Autoridade Protesaun Sivil  iha munisipiu sira sei, kontinua halo levantamentu dadus ba uma-ka’in ne’ebé hetan estragus makas, no uma kain ne’ebé hetan estragus naton, bele hetan apoiu iha faze tuir mai.

Jornalista : Geraldino Magno

Editor : Média RKDTL