REPRESENTANTE DIRETOR TP ABERTURA FORMASAUN JORNALISMU BA DALA 76

Dili-22/10/2024-Média Defisiensia, Representante Diretor Ezekutivu Timor-Post abertura formasaun jornalismu ba dala 76, hodi kontinua fó Formasaun Jornalismu Baziku ba maluk defisiensia no la defisiensia sira, atu bele kapasita sira nia abilidade iha área jornalismu nian hodi aumenta sira nia koñesimentu.

Tuir Representante Diretor Ezekutivu Timor-Post Abrão de Jesus nu’udar Xefe Negosiu halo abertura ba formasaun jornalismu, hodi fó parabens no bem-vindu ba maluk formandu-na’in 8 ne’ebé inkluzivu iha, sei partisipa iha formasaun refere durante fulan haat, hodi hasa’e sira nia abilidade no koñesimentu iha mundu jornalismu.

“Bem-vindu ba formandu sira hotu mesmu na’in 5 mak marka presensa iha abertura kona-ba formasaun jornalismu, no tuir matenek-na’in balun hatete laiha limite no matenek kuadu ita  hakarak aprende, liuhusi siensia hakarak aprende ita tenke hatene, no formandu sira nia presensa iha ne’e ita boot sira hakarak aprende buat ruma husi mundu akademiku, mundu siensia no mundu koñesimentu, lori Diretor Ezekutivu hakarak hato’o parabens no bem-vindu ba alin sira hotu, oportunidade di’ak ida ne’e halo tuir ba hodi aprende mundu jornalismu espera katak alin nain 8 bele finaliza hodi sai jornalista profisional”, Dehan Rep. Diretor TP Abrão iha Salaun TP 22/10.

Iha fatin hanesan Formandu Eufrosina Braz afirma, sente kontente bele iha oportunidade tuir formasaun jornalismu iha sentru Timor-Post, nune’e formandu sira bele kapasita sira nia kapasidade iha área jornalismu.

“Hau sente kontente liuhusi ADTL bele fó oportunidade atu bele partisipa iha kursus kona-ba jornalista nian, iha Timor-Post ba hau sente kontente maske ho defisiensia maibé nafatin iha vontade atu tuir formasaun, nune’e bele haklean liutan hau nia koñesimentu iha área jornalista nian”, Tenik Efrosina.

Entretantu, iha formasaun jornalismu ne’e durante fulan haat tuir regras sentru Timor-Post  nian, formandu sira sei aprende teoria fulan ida, sei hasoru malu oras neen kada semana ida, pratika internal sei hasoru malu loron-loron  fulan ida no estajiu fulan rua. Iha formasaun ne’e ema la ho defisiensia-na’in lima no ema ho defisiensia fiziku-na’in tolu.

Jornalista : Eufrosina Braz

Editor : Média RKDTL