APTC FASILITA FORMASAUN MIKRO KREDENSIAL BA EhD DURANTE LORON RUA

 

Dili-23/10/2024-Média Defisiensia, Australia Pacific Traning Coalition (APTC), Fasilita Formasaun Mikro Kredensial liga ba utilizasaun Plataforma Online, hodi hasa’e koñesimentu ema ho defisiensia nian durante loron rua, hahu 22 to’o 23 Fulan Outubro tinan ne’e.

Tuir Fasilitadór Formasaun Adão Hornay hatete, APTC nia programa sira imoprtante ba ema ho defisiensia, hodi fasilita kursus sira ba EhD, tanba ne’e atividade formasaun mikro kredensial nian koalia liu kona-ba konteudu sira  oinsa ema bele uza platafoma online ho di’ak.

“APTC eziste iha Timor-Leste husi 2018 too ohin loron, ami nia programa prioridade ida mak tau matan ba EhD, ami mós hala’o ona kursus Ingles no Kafetaria ba EhD, ohin kontinuasaun fó formasaun ita hanaran mikro kredensial  ninian konteudu liga ba online, ita bele asesu liuhbusi plataforma online. APTC  servisu hamutuk ho TAFE QUEENSLAND ne’ebé koinesidu iha Australia, hodi oferese kursu ida ne’e gratuita  ba Timor-Oan sira, no kursus refere oferese ba ema lubuk ida no ohin ami oferese ba Ema ho Defisiensia”, Dehan Fasilitadór Adão iha Salaun AHISAUN Ai-Mutin, 23/10.

Fasilitadór ne’e hatutan, formasaun ho objetivu atu tulun maluk defisiensia sira hodi hatene kona-ba mikro kredensial oinsá atu uza plataforma online iha atividade sira, tanba ne’e ohin konklui ona konteudu sia (9) sira sente entende ho material ne’ebé oferese ba formandu sira.

“Objetivu husi formasaun ne’e EHD bele aumenta kapasidade hanesan ho ema seluk liuhusi treinamentu  mikro kredensial nian, ba loron rua ne’e ami finalize deit konteudu Sia, no iha unidade barak mak sira konsentra hotu balu ligasaun ho agrikultura no balun liga ho skill baziku oinsa mak uza internet, E-mail no plataforma Facebook no Whatshapp no seluk mak ligasaun ho bisnis nian koalia kona-ba lideransa, efektividade servisu, rekursus umanus no seluk tan. Kursus refere naton de’it presiza kapasidade influensia partisipante sira bele komprende konteudu husi formasaun ne’e”, Afirma Fasilitadór APTC.

Iha fatin hanesan Formandu EhD Fiziku Agida Mendonça da Conceção afirma, agradese no kontente tebes bele partisipa iha atividade formasaun kona-ba mikro kredensia, haree liu ba uza plataforma online sira atu bele kapasita maluk defisiensia sira nia koñesimentu iha futuru bele uza plataforma sira ne’e ba atividade loro-loron.

“Hau orgullu tebes ba APTC tanba hau bele aprende saida mak hau sedauk hatene, no hau bele aprende fali iha formasaun ne’e kona-ba saida mak mikro kredensial, komputador no maus nia objetivu ba saida atu bele fasilita ami ba ami nia atividade sira  ida ne’e mak ami hetan durante loron rua”,Tenik Formandu Agida da Conceao.

Entretantu, EhD agradese ba APTC ba formasaun durante loron rua no sira hetan sertifikadu sira sente kontentese, no husu ba maluk defisiensia sira ne’ebé rona informasaun sira hanesan ne’e keta husik liu de’it, tanba tempu hanesan osan mean, ita hetan informasaun nune’e tenke tuir hodi sente benefísiu husi formasaun ne’e rasik.

Jornalista : Geraldino Magno

Editor       : Média RKDTL