MUTL LA KONKORDA HO DESIZAUN PN NIAN SOSA KARETA FOUN BA DEPUTADU

 

Dili-08/10/2024-Média Defisiensia, Movmentu Unversitario Timor-Leste (MUTL), realiza komunikadu tanba la konkorda ho desizaun politika ida ne’ebé injustu husi deputadu 65 iha Parlamentu Nasional, ba desizaun atu sosa kare luxu lori osan povu nian ne’ebé aprova ona husi deputadu sira, iha loron 18 fulan Setembro tinan 2024 ho montante osan 40 mil milioéns.

 Tuir Porta Voz MUTL Cristiano José Trindade hatete, sira nia parte la konkorda desizaun Deputadu sira nian, hodi sosa kareta foun ne’e MUTL konsidera desizaun politika ne’ebé injustu hodi hamate futuru nasaun nian.

“Ami nia pozisaun hamutuk ho povu tomak la konkorda dezisaun ida ne’e no ami konsidera desijaun ne’e hanesan dezisaun politika ne’ebe injustu no naok ka korupsaun legal ne’ebé Deputadu 65 iha PN halo ba estadu, no indika fó ameasa boot ba hamate futuru estadu Timor-Leste nian. Tanba haree ba situasaun atual dadaun ne’e TL hasoru hela problema saude iha Timor-Leste (Aimoruk laiha), Problema Edukasaun ne’ebé, ohin loron labarik barak sei abandonadu, no kauza tan ho professores barak mak lakon sira nia direitu too agora seidauk rezolve, folin nesesidade bázika iha merkadu presu aumenta ba bebeik seidauk resolve no problema seluk tan, ne’ebé mak sakrifika povu ne’e sai vitima ba bebeik inklui setor agrikultura no produsaun barak mak abandonadu hela hamutuk ho deve ne’ebé barak tebes. Maibé deputadu sira laiha neon tanba lakon ona sira nia ispiritu nasionalismu ba rai-ne’e, hodi hanoin sira nia an”, Dehan Porta Voz MUTL liuhusi Komunikadu Imprensa, iha Jardin 5 de Maio, 08/10.

Porta voz ne’e hatutan deputadu sira representa povu iha uma fuku PN hodi resolve problema ne’ebé povu hasoru iha baze, maibe sira produs lei hodi uza povu nia osan sosa kareta foun

 “Representante povu iha PN la preokupa hodi resolve problema hirak ne’e maibe, pelo kontario sira rasik mak produs lei hodi hanoin deit sira nia an sosa kareta luxu ne’ebe uza povu ida ne’e nia osan hodi fo previlezio ba sira nia an ho familia, no fó impaktu no hamate futuru Timor-Leste nian ho hahalok ne’e maka povu no sosiedade ida kontra hahalok at ne’ebé hatudu ba povu ne’e, no husu ba deputadu 65 iha PN atu refleta ho konsiensia ba hahalok no dezisaun ne’ebé sira halo. Ohin loron IX GK iha orgaun legislativa (PN) nafatin hakarak produs proposta ho lei Nú 4. Hodi apresenta ba programa hodi sosa kareta luxu lori osan povu nian ne’ebé sira aprova tiha ona iha loron 18 fulan setembro tinan 2024 ho montante osan 40 mil, milioéns ba sira nia an, hodi lao loko-an iha povu ne’e nia terus leten no dadun ne’e Timor-Leste tama ona ba iha krize ekonimia rai-laran ho deve ne’ebé barak tebes husi banku Federa, Banku Asean, Xina nomos País sira seluk, ne’ebé ita investe ona maibé ohin loron Timor-Leste sei nakonu ho númeru kiak, mukit, Hamlaha mal nutrisaun, hahu husi labarik, Joven no inan-aman barak maka sakrifika sira nia an moris tuir dalan ninin hodi sobre vive iha estadu ida ne’e”, Tenik Porta Voz.

 MUTL  mós rekomenda no husu ba membru deputadu na’in 65 iha PN Orgaun Legislativa IX GK atu refleta fila fali  ho  fuan no konsiensia ba dezisaun sira mak MUTL husu atu anula ka kansela fila-fali proposta lei Nu.4 viaturas e transportes dos deputadus ka sosa kareta foun ba deputadu sira ne’ebe vota maioria absoluta tiha ona iha loron 18 fulan Setembro tinan 2024 por konsiensia. Ba Orgaun Prezidente Repúblika atu veta ka kansela lei ne’ebé fó bokur ba ema ka grupu balun de’it, maibe laos interese Povu nian. Husu ho konsiensia atu ita bo’ot sira utiliza deit ita bo’ot sira nia salariu ne’ebé simu kada fulan 2 mil e tal balun too iha 4 mil hodi sosa kareta ba imi nia an laos explora povu nia osan no uza povu nia osan la tuir povu ninia hakarak.

Entretantu, MUTL deklara ba povu hotu-hotu iha estadu ne’e, mai hamutuk hodi nafatin kontra desizaun naok legal, explorasaun no korupsaun legal ne’ebé reprezentante povu iha PN halo, atu salva lalais ona futuru nasaun Timor-Leste nian, hanesan mensajen ne’ebé Papa Francisco fó hela mai ita iha tasi-tolu loron 10 Setembro 2024 katak “kuidadu ho lafaek sira tanba sira sei naok hotu ita nia kultura no naok hotu ita nia rikusoin no lafaek sira ne’e maka mosu dadun mai ne’e”,  husu ba povu hotu-hotu atu hamrik hodi kontra lafaek sira ne’e iha Timor-Leste, tanba povu la konkorda atu sosa kareta foun ba Deputadu sira iha PN.

 

Jornalista : Anselmo Martins

Editor       : Média RKDTL