APC-UN WOMEN ASINA AKORDU HODI FORTALESE KOOPERASAUN IHA TL

 

Dili-20/09/2024-Média Defisiensia, Sekretaria Estadu Protesaun Sivil (SEPC), asina akordu ho UN Women hodi fortalese servisu dezastre sira, no kapasita inan feton kona-ba risku dezastre  iha Timor-Leste.

Sekretaria Estadu PC Domingos Mariano Reis hatete, liuhusi akordu ne’e APC servisu hamutuk ho UN Women hodi kapasita inan feto sira, bainhira hasoru risku dezastre ina feton sira bele preparadu ona.   

“Ohin ita asiste ona APC asina akordu ho UN Women atu fortalese kooperasaun husi parte rua, entermos kapasitasaun ba grupu feto sira, bainhira dezastre akontese feto sira prepara ona atu bele responde no rekopera ba sira nia aan no familia. Anualmente bazeia ba relatoriu anual TL lakon nia rikusoin hamutuk 5. 9 millões dolar husi dezastre, tanba ne’e APC halo kooperasaun parte hotu, oinsa bele halo redusaun ba risku dezastre”, Afirma Sekretariu Estadu PC iha Salaun APC Caicoli, 20/09.

SEPC hatutan, APC nia prioridade mak atu kapasita inan feton sira no hasa’e koñesimentu kona-ba risku dezastre iha TL, no atividade sei implementa iha munisipiu tolu ho orsamentu 80 mil ba tinan oin.

“Planu prioridade dahuluk mak kapasita feto sira, hodi bele hasa’e koñesimentu kona-ba kauza dezastre oinsa atu prevene, prepara feto ne’ebé rejilente hasoru dezastre atividade ne’e sei implementa iha munisipiu tolu mak Ermera, Viqueque no Suai preve orsamentu hamutuk 80 mil ne’e ba tinan 2025 nian. Liuhusi diresaun prevensaun no metigasaun no UN Women mós prepara apoiu orsamentu balun no teniku sira sei elabora atu bele halo planu ho asaun ne’ebé detallu molok implementa”, Dehan Sekretariu Estadu.

Iha fatin hanesan Head Office UN Women Timor-Leste Amy Nishtha Satyam afirma, agradese baSekretariu Estadu APC bele simu UN Women, hodi asina akordu atu bele servisu hamutuk hodi tau matan ba iha área haat, liuliu ba inan feto sira ne’ebé sempre hasoru risku dezastre makas iha rai laran

“Agradese ba Sekretariu Estadu APC fó ona oportunidade ba iha kolaborasaun liuhusi asina akordu entre APC ho UN Women, hodi haree liu ba partisipasaun feto iha redusaun risku dezastre no empoderamentu feto iha rejilensia klimatika, iha estudu hatrudu katak bainhira dezastre akontese ida ne’ebé sai vitima barak liu maka inan feton sira. Tanba ne’e liuhusi asina akordu atu servisu hamutuk ho APC, hodi haree ba área haat importante ida mak suporta teknika ba iha dezenvolvimentu kona-ba redusaun risku dezastre ba feto, rua fornese kapasitasaun kona-ba dezastre ba inan feton, tolu fornese kapasitasaun empoderamentu ekonomia feto ba rejilensia klimatika, no haat suporta APC ba iha implementasaun dezenvolvimentu no planu asaun nasional matadalan politika sira ne’ebé sensivel ba jeneru, liuhusi asina akordu ida ne’e laos asaun maibé tenke tau iha pratika hodi tulun inan feton sira iha área remotas hodi redus dezastre iha Timor-Leste”, Tenik Head Office UN Women Timor-Leste Amy.

Entretantu, APC sei hala’o edukasaun redusaun risku dezastre ba feto sira, tanba feto sira vulneravel bainhira dezastre mosu sira lakon sira nia vida, rikusoin, oan sira no ekonomia familia.

Jornalista  : Geraldino Magno

Editor        : Media RKDTL