Dili, 02/07/
2024,Media Defisensia, Prezidente
no Laureadu Nobel da Pás, José. Ramos-Horta hahú vizita ofisiál estadu nian ba
Repúblika Moçambique no Repúblika Angola husi loron 3 to'o loron 10 fulan-jullu
tinan 2024. Vizita hirak-ne'e ho objetivu atu hametin relasaun diplomátika,
promove kooperasaun, no hametin relasaun bilaterál ho nasaun Lusófonu sira.
“Durante
vizita ba Moçambique husi loron 3 to'o loron 7 fulan-jullu, Prezidente
Ramos-Horta sei hala'o sorumutu Tête-à-Tête ho Prezidente Moçambique, S.E.
Filipe Jacinto Nyusi. Prezidente sei partisipa iha sorumutuk bilaterál sira,
tuir mai ho asinatura akordu sira, no konferénsia imprensa konjunta ho
Prezidente Nyusi.
Prezidente nia programa iha Moçambique sei inklui mós tau
koroa aifunan iha Prasa Erói nian, simu Xave Sidade Maputo nian, hasoru ho Prezidente
Asembleia Repúblika Moçambique nian, Sua Eselénsia Esperança Bias, atende
Banquete Estadu iha Palásiu Ponta Vermelha, fó palestra iha Universidade
Eduardo Mondlane kona-ba "Timor-Leste, Rejiaun no Mundu," no vizita
Sentru Análize Estratéjika CPLP nian.
Prezidente Ramos-Horta sei halo viajen ba Luanda, Angola,
husi loron 8 to'o loron 10 Jullu 2024. Programa Prezidente nian iha Angola
inklui partisipa iha serimónia estadu, halo enkontru bilateral no sorumutu
Tête-à-Tête ho Prezidente Angola, S.E. João Lourenço, no tuir mai ho
konferénsia imprensa. Prezidente Ramos-Horta sei hasoru mós ho Vise-Prezidente
Angola, S.E. Esperança da Costa, no Prezidente Asembleia Nasionál, S.E.
Carolina Cerqueira. Prezidente sei fó palestra ida iha Akademia Diplomátika
Venâncio de Moura, vizita Akademia Polísia, no atende serimónia ida iha
fasilidade foun Embaixada RDTL nian iha Angola.
Vizita estadu sira ne'e hatudu Timor-Leste nia kompromisu
atu haforsa ninia relasaun internasionál no haburas kooperasaun iha Komunidade
Nasaun Lian Portugués nian, CPLP.
Prezidente hein atu halo diskusaun produtivu kona-ba
interese komún, inklui kooperasaun ekonómika, interkambiu kultural, no
seguransa rejionál. Timor-Leste nia relasaun ho Angola no Moçambique metin iha
istória komún hanesan antigas kolónias Portugésa no membru CPLP. Vizita
hirak-ne'e reprezenta pasu signifikativu ida atu haforsa ligasaun no esplora
dalan foun sira ba kolaborasaun.
Jornalista : Anselmo Martins
Editor :
RKDTL
0 Comments