Ohin, loron 5 fulan-setembru tinan 2023 15:13h-Media
Defisiensia, realiza serimónia transferénsia poderes lideransa Servisu
Nasionál Intelijénsia (SNI) sesante ba lideransa foun, iha Palásiu Governu,
Dili.
Primeiru-Ministru, Kay Rala Xanana Gusmão, liuhusi
Despaxu n. 006/GPM/IX/2023, hafoin “komunikasaun prévia no konsulta ho
Prezidente Repúblika”, nomeia Longuinhos Rabindranath Tagore Domingues de
Castro Monteiro no Egas de Araújo Moniz, ida-idak hanesan Diretór-Jerál no
Diretór-Jerál Adjuntu, Servisu Nasionál Intelijénsia nian.
Iha Despaxu ne’e, Primeiru-Ministru afirma katak
desizaun ne’e tau iha konsiderasaun “rekoñese ona señór Longuinhos Monteiro nia
idoneidade, integridade, kapasidade téknika no profisionál, ho formasaun
universitária no esperiénsia prévia barak iha asuntu legál no seguransa nian,
nune’e mós señór Egas Moniz ne’ebé iha esperiénsia barak ba servisu
intelijénsia nian.
Responsavel foun ba Servisu Nasionál Intelijénsia,
Longuinhos Monteiro, formadu iha direitu, dezempeña ona kargu públiku oioin
ne’ebé importante, hanesan Prokuradór-Jerál Repúblika timorense,
Komandante-Jerál Polísia Nasionál Timor-Leste no Ministru Interiór iha Governu
Konstitusionál da-6. Iha tinan 2012
hetan kondekorasaun husi Prezidente Repúblika, José Ramos-Horta, ho marka Orden
Timor-Leste nian.
Ministru Prezidénsia Konsellu Ministrus, Agio Pereira,
iha ninia intervensaun durante serimónia ne’e, “lori Governu Konstitusionál
da-9 nia naran no, liuliu lori S.E. Señór Primeiru-Ministru, Kay Rala Xanana
Gusmão nia naran”, agradese ba “dedikasaun Diretór-Jerál sesante nian” no
hateten katak “intelijénsia, nu’udar servisu Estadu nian ida ne’ebé sensitivu
tebes, la’ós siénsia ezata ida, maibé hanesan liu arte ida ne’ebé ninia
evolusaun presiza dixiplina, kriatividade no inovasaun barak.
Ministru Agio Pereira defende katak “ohin, liu fali
molok ne’e, hafoin tinan 14 ninia ezisténsia, tenke fó ba SNI ho kondisaun sira
ne’ebé apropriada, inklui hasa’e rekursus umanus, ho kualidade ne’ebé aas atu
aumenta kapasidade hodi hatán ba nivel importante sira hotu atu serbí Estadu no
ninia soberania di’ak liután.
Garante mós katak, “Governu sei kontinua apoia
esforsus Diretór-Jerál no ninia ekipa, hodi garante kondisaun serbisu sira ho
di’ak-liu no aumenta efikásia no efisiénsia ba ajénsia ida-ne’e atu antesipa
surpreza kontra Estadu no kontra soberania nasionál.
Longuinhos Monteiro, iha ninia diskursu simu pose
nian, agradese ba konfiansa husi Primeiru-Ministru ne’ebé fó ba nia no
kompromete atu “lidera SNI ho determinasaun, dedikasaun no paixaun, ba defeza,
seguransa no buat hotu, integridade ba instituisaun ida-ne’e no ita-nia
soberania.
Diretór-Jerál foun SNI nian defende katak “ajénsia
ne’e tenke sai modelu ida ba konduta étika no legál, no garante katak ninia
asaun sira sempre bazeia ba aplikasaun lei no integridade ba ita-nia justisa no
ba ita-nia soberania” no deklara katak “SNI dezempeña papél krusiál ida ba
salvaguarda ita-nia interese nasionál tomak, liuliu, iha área krítika mundu
virtuál, intelijénsia artifisiál no seguransa sibernétika”.
0 Comments