PROGRAMA ADVOKASIA HUSI AHDMTL HODI FO TREINAMENTU BA AUTORIDADE LOKAL IHA MUNISIPIU LIGA BA ASUNTU EHD NIAN

Programa Manejer AHDMTL Luciano Borjes

Dili-18/09/2023, Media Defisiensia, Objetivu husi Programa Advokasia ida ne’e oinsa atu fo treinamentu ka sensibilizasaun ba komunidade no Autoridade lokal sira atu fo Oportunidade no laiha deskriminasaun ba Ema ho Defisiensia iha Timor-Leste.

Dada lia iha Studio RKDTL Programa Manejer Luciano Borjes hatete programa Advokasia lidera husi EhD, atu realiza programa ne’e ekipa AHDMTL hala’o enkontru ho liña ministeriu sira antes tun ba base hodi fo treinamentu ba Autoridade lokal no hala’o Advokasia direita nomos liu husi media nune’e ema hotu bele tau importansia ba EhD Matan no tipu EhD sira seluk, hodi la hetan tan Deskriminasaun husi ema seluk.

‘‘Programa Advokasia ne’ebé lidera husi ema ho Defisénsia matan, no ema Defisiénsia hamri’ik luta aktus deskriminasaun hotu-hotu ne’ebe mak hasoru ema Defisiénsia iha iata nia sosiedade nia le’et. Antes atu hala’o programa ne’e halo enkontru uluk ho lideransa sira iha kada Ministeriu no Ministeriais sekretariu estadu sira, buat ne’ebe hala’o iha advokasia maka tun ba iha baze liuliu iha suku, postu, nomos iha Munisipiu oinsá fo treinamentu Sensibilizasaun ba autoridade lokal atlu fo importánsia ba ema ho Defisiénsia sira atu nune’e labele iha deskriminasaun.

Maneira seluk husi advokasia nian maka halo komunikasaun iha media social, radiu komkunidade, RTTL no GMN dalaruma mos husi Brosour atu nune’e ema bele hatene advokasia ema ho Defisiénsia nian no programa Advokasia ida ne’e espesifiku ba ema Defisiénsia matan, maibé iha parte seluk mós ami tau mós advokasia enjeral ba tipu Defisiénsia sira hotu, tanba servisu referal’’ dehan programa Manejer AHDMTL iha Studio RKDTL Aimutin Dili.

Nia hatutan Programa advokasia mos hala’o oinsa atu hare fatin sira ne’ebe maka la asesibilidade ba ema ho Defisiénsia hanesan fatin eskola, fatin saúde, nomós intituisaun públiku sira atu nune’e bele rekomenda ba governu tau matan fatin sira hodi labele fó impaktu ba ema Defisiénsia sira atu asesu.

Bainhira hala’o prgrama advokasia ida ne’e iha nia dezafiu maka, tun ba iha tereinu sempre hetan deskriminasaun husi sosiedade sira ne’e katak ita halo bebeik maibé ita nia sosiedade seidauk iha konsiénsia masimu hodi muda sira nia hanoin.

Entaun iha programa refere la fasil ba ita atu muda ema ida nia hanoin tuir saida ita hatene, liu husi dezafiu sira ne’e katak sai oportunidade ida ba ita ka ADHMTL atu halo advokasia diak liu tan iha futuru, tenik nia iha Studiu RKDTL.

Iha nia parte rekomenda ba Governu ka Instituisaun sira atu debate ba asuntu EhD nian ho fuan, tanba EhD barak mak Eziji sira nia direitu, no nia mos rekomenda ba komunidade no sosiedade sira atu uza termonolojia ne’ebe los hodi lahetan tan deskriminasaun ba EhD.    

Rekomendasaun ba governu ka instituisaun sira ne’ebé tau matan ba ema ho Defisiénsia katak, debate karik, debate ho fuan labele debate ho liafuan tanba ema ho Defisiénsia barak maka ezije hela sira nia direitu maibé ita husik le’et de’it,

Iha parte seluk husu mos ba ita nia sosiedade, ka familia sira atu fo importansia ba ema ho Defisiénsia atu hatudu abilidade, hatudu kapasidade ne’ebé ema ho Defisiénsia iha no labele izola ka deskrimina sira nune’e uza termonolojia ne’ebé dignu ba sira atu nune’e bele hasai sira husi deskriminasaun ba dezenvolvimentu ida ne’ebé diak no inkluzivu.

Jornalista: Adriano dos Santos

Editor: Alexandre Salsinha