AUSTRALIA NAFATIN APOIU PROGRAMA BA FUNDASAUN AHISAUN

 

Dili-26/09/2023-Media Defisiensia, Fundasaun Ahisaun hetan Vizita husi Kompañia Mountford Berries husi Australia Tasmania hodi kontinua koperasaun liu-husi servisu Saude Hijene no programa sira seluk.

Kompañia Mountford Berries husi Australia Tasmania halo vizita mai Fundasaun Ahisaun hodi halo koperasaun servisu no fó apoiu fundus balun ba nesesidade Ema ho Defisiensia nian iha Fundasaun Ahisaun.

“Ami nia vizita ida ne’e hodi halo relasaun no fó apoiu hanesan sosializasaun husi ami nia kompaña rasik, liuhusi fundus balun ne’ebé ami iha atu hare liu ba iha saúde hijene. Tamba ne’e ami nafatin husu ba Fundasaun Ahisaun atu nafatin halo koperasaun di’ak ho kompañia nune’e ami sei apoiu mós ba programa balun”. Dehan kompañia MountFord Berries iha fatin Fundasaun Ahisaun

Diretór Fundasaun Ahisaun Domingos Talo Mau dos Santos iha intervista ba jornalista RKDTL hatete, Senti orgullu bo’ot ba kompania MountFord Berries husi Australia Tasmania ne’ebé mai vizita maluk defisiensia sira iha Fundasaun Ahisaun hodi halo relasaun servisu entre kompania ho Fundasaun Ahisaun iha tempu tuir mai.

“Ami apresia ho kompania nia vizita sai oportunidade di’ak ba Fundasaun Ahisaun hodi hato’o programa sira ne’ebé Fundasaun Ahisaun iha hanesan programa Edukasaun nomos Advokasia nune’e kompania sei nafatin fó apoiu fundus ba ema ho defisiensia hodi bele asesu ba iha edukasaun no formasaun sira”. Dehan Diretor iha estudiu RKDTL

Diretór ne’e hatutan, liuhusi apoiu ida ne’e bele halo relasaun servisu di’ak liután entre kompania ho Fundasaun Ahisaun hodi bele tulun maluk defisiensia sira iha futuru.

“Vizita ne’ebé kompania Mountford Berries hala’o mai iha Fundasaun Ahisaun, iha etapa dahuluk ho sosielizasaun Ai-han, iha etapa daruak ida ne’e sira sei hare liu ba iha Saúde hijene fatin no ai han ho saudavel ba ema ho defisiensia sira, sei fo apoiu ba rehabilitasaun dapur iha Fundasaun Ahisaun nomós sei iha posibilidade apoiu mós ba edukasaun non formasaun sira”.

Entretantu liuhusi vizita ida ne’e kompania fo apoiu orsamentu total ho montante $500, hodi hadia fasilidade dapur iha fundasaun Ahisaun, nomós saude hijene  ba ema ho defisiensia sira.

Jornalista: Jeraldino Perreira Magno ho Eufrosina Soares Brás

Editor: Alexandre Salsinha